Կառավարությունը Կարեն Կարապետյանի ու քաղաքական մեծամասնության հետ մեկ թիմ է. Շարմազանով

Կառավարությունը լավ է աշխատում՝ ապահովելով տնտեսական ակտիվ տեմպեր. խորհրդարանում լրագրողներին վստահեցրեց ԱԺ փոխխոսնակ Էդուարդ Շարմազանովը:

«Տնտեսական ակտիվության տեմպերը՝ վեց տոկոսից ավելի, կարծում եմ, դրական միտումներ ապահովում են, և ես կարող եմ ասել, որ կառավարությունը, Կարեն Կարապետյանի գլխավորությամբ, քաղաքական մեծամասնության հետ մեկ քաղաքական թիմ է», - ընդգծեց նա:

Շարմազանովը նշեց, որ Կարապետյանի գլխավորած կառավարությունն իրականացնում է խորհրդարանում հավանության արժանացած ծրագիրը։

Դիտարկմանը՝ շոշափելի արդյունքներ չեն զգացվում, նա չհամաձայնեց և նշեց, որ արտահանումը շեշտակի աճել է, տուրիզմի ոլորտում է աճ գրանցվել։ «Մենք տեսնում ենք այն դրական միտումները, որ կառավարությունն իրականացնում է, և մենք աջակցում ենք այդ կառավարությանը»,- ասաց Շարմազանովը։