Կհասնենք ապրիլ ամսին և միասին կընտրենք վարչապետին. Բաբլոյան

Այսօր «Արգենտինյան Հանրապետություն» դպրոցում ԱԺ նախագահ Արա Բաբլոյանը, ով նույնպես այդ դպրոցում է սովորել, լրագրողների հետ զրույցում նշեց, որ պետության հիմնական առաջնահերթությունները երկրի անվտանգությունը, ժողովրդի առողջությունն ու հասարակության կրթությունն են:

Ըստ Բաբլոյանի` անվտանգ երկրում կրթված և առողջ ժողովուրդը կարող է ստեղծել բոլոր պայմանները բարեկեցիկ պայմաններում ապրելու համար:

«Այս առումով շատ կարևոր է, որ մենք չլինենք փակված, լինենք բաց հարաբերությունների համար: Այսօր շատ լավ օրինակ է հայ-արգենտինյան բարեկամությունը: Այսօր հայ-արգենտինական լավ հարաբերությունները հնարավորություն  են տվել վերակառուցելու մի դպրոց, որը 65 տարի է` գործում է ՀՀ-ում: Այս դպրոցը հիմա նոր որակով է կրթում աշակերտներին: Մենք ՀՀ-ում Արգենտինայի դեսպան Գոնզալո Ուրիոլաբեիտիայի հետ քննարկել ենք, որոշել նոր մոտեցումներ ու ծրագրեր ներկայացնել հայ-արգենտինյան հարաբերությունները խորացնելու համար»,- ասաց նա:

ԱԺ Նախագահը պատասխանեց լրագրողների քաղաքական հարցերին: Մասնավորապես` հարցին`ապրիլին ո՞վ կլինի ՀՀ վարչապետը, նա արձագանքեց.  «Երեխաների համար կարևոր է, որ լինի խաղաղություն, որ իրենք կարողանան սովորել: Ծնողների համար կարևոր է երկրի զարգացումը: Կգանք, կհասնենք ապրիլ ամսին և միասին կընտրենք վարչապետին»:

Դիտարկմանը, որ տեսակետ կա, թե այս հարցում կառավարությունը միատարր որոշում չունի, Բաբլոյանն արձագանքեց. «Հանրապետականը միատարր է, և մենք ունենք միատարր կարծիք, որը կորոշվի ապրիլին»: