Ունիվերսիադա. ուշուիստ Կարապետ Թեւոսյանն առնվազն բրոնզե մեդալ է ապահովել

Թայվանի Թայփեյ քաղաքում ընթացող ամառային 29-րդ համաշխարհային ուսանողական խաղերում ուշուիստ Կարապետ Թեւոսյանն (70 կգ) անցել է կիսաեզրափակիչ եւ առնվազն բրոնզե մեդալ է ապահովել։

Քառորդ եզրափակչում Թեւոսյանը հաղթել է Բելառուսի ներկայացուցիչ Եվգենի Սլիպցովին: Նրանց մրցավեճի առաջին ռաունդում Բելառուսը հաշվի մեջ առաջ է եղել՝ 1:0: Սակայն ընդմիջումից հետո Կարապետը բացահայտ առավելություն է ստացել եւ մրցակիցը ստիպված հրաժարվել է մարտը շարունակելուց:

Այսօր Թեւոսյանը կիսաեզրափակիչում կմրցի իրանցի Ջաֆար Շիրզադեհի հետ:

Հայաստանի երկրորդ ուշուիստը՝ Հայկ Գասպարյանը (60կգ), դուրս է մնացել մրցանակային տեղի համար պայքարից։ Այս մասին տեղեկացնում է ՀՀ ուսանողական մարզական ֆեդերացիան:

Ավելի վաղ ջրացատկորդ Վլադիմիր Հարությունյանին չէր հաջողվել 10 մ անհատական աշտարակացատկ մրցաձեւում անցնել եզրափակիչ։ Նա վաստակել էր 342,60 միավոր։