Համայնքների խոշորացմամբ դրանց տրվող միջոցներով հնարավոր է լինելու շատ հարցեր լուծել

Շարունակվում են մարզպետ Աշոտ Սիմոնյանի այցելությունները  մարզի համայնքներ: Հերթական այցը  օգոստոսի 2-ին էր: Արագածավանի համայնքապետարանում մարզպետը հանդիպեց Թալինի տարածաշրջանի Արագածավան, Արտենի, Գետափ եւ  Լուսակն համայնքների ղեկավարների հետ: Սրանք այն համայնքներն են, որոնք խոշորացման ծրագրով միավորվելու են մեկ՝ Արագածավան համայնքի մեջ:

Խորհրդակցությանը ներկա էին նաեւ ավագանու անդամներ, ինչպես նաեւ Արագածավանի բնակիչներ:

Աշոտ Սիմոնյանը  ողջունեց ներկաներին եւ նշեց, որ իրենց առաջին հանդիպումից նա ակնկալում է գործնական եւ արդյունավետ քննարկումներ: Համայնքների ղեկավարները ներկայացրին իրենց համայնքներում առկա այն հիմնախնդիրները, որոնց լուծման հարցում ակնկալիքներ ունեն վերադաս մարմիններից:

 Արագածավանի համայնքապետ Անդրանիկ Պապիկյանը բարձրացրեց կարկտահարության պատճառած վնասների, երկու օր առաջ ուժեղ քամիներից քանդված բազմաբնակարան շենքերի տանիքների, ոռոգման ջրի մատակարարման հարցերը: Ոռոգման  խնդիրը մտահոգում էր նաեւ ներկա մյուս համայնքապետերին:

Լսելով համայնքների ղեկավարներին, մարզպետը նշեց, որ համայնքներում առկա բազմաթիվ խնդիրների լուծումը ենթադրում է բոլորի համատեղ ու համագործակցված աշխատանքը: Նա հորդորեց համայնքների ղեկավարներին, յուրաքանչյուր բնակչի հետ անհատապես աշխատել, նրանց ներգրավել համայնքի զարգացման գործընթացին:

Անդրադառնալով համայնքների խոշորացման ծրագրին, Աշոտ Սիմոնյանը համոզմունք հայտնեց, որ այդ շրջանակում համայնքներին տրվող  միջոցներով հնարավոր է լինելու շատ ու շատ հարցեր լուծել:

Քննարկվեցին նաեւ «Մաքուր Հայաստան» ծրագրի շրջանակում աղբահանության կազմակերպման եւ սանիտարական մաքրման, սեփական եկամուտների հավաքագրման, հանընդհանուր հետաքրքրության այլ հարցեր: