«Համահայկական տնտեսական համախմբումը» Փարիզում կստեղծի հայ գործարարների ցանց

Անցնող շաբաթավերջին Փարիզում տեղի ունեցավ տարբեր երկիրներից ժամանած հայ գործարարների հանդիպումը, որով սկիզբ դրվեց նորակազմ «Համահայկական տնտեսական համախմբում»-ին:

Նկատի առնելով աշխարհասփյուռ հայության տնտեսական եւ գործարար հնարավորությունները եւ այդ կարողականությունը համախմբելու եւ առավել արդյունավորելու անհրաժեշտությունը` հանդիպման մասնակիցները որոշեցին ստեղծել հայ գործարար ցանց, որի կառավարումը կվստահվի արհեստավարժ ու մասնագիտական հիմունքներով գործող կառույցի։

«Համահայկական տնտեսական համախմբումի» (Panarmenian Economic Assembly)  առաքելությունն է` ամրապնդել, խթանել եւ պաշտպանել հայ ազգի բազմակողմանի զարգացումը` ի մի խմբելով հայ անհատական ֆինանսական եւ մասնագիտական կարողականությունը եւ գոյացած աշխարհասփյուռ ներուժը օգտագործելով ի նպաստ հայ անհատի, հայ ժողովորդի եւ հայրենիքի:

Մասնակիցները երկու օրերերի ընթացքում արտահայտեցին բազմազան մտահոգություններ ու կարծիքներ, ներկայացրին առաջարկներ եւ հաստատեցին «Համահայկական տնտեսական համախմբումի» սկզբունքները։

Ժողովը կազմեց հատուկ հանձնախումբ, որի պարտականությունն է Փարիզի հանդիպումից բխած գաղափարների եւ որդեգրված  սկզբունքների հիման վրա պատրաստել Համախմբումի ուղեգիծն ու գործելաոճը, ինչպես նաեւ առաջիկա ամիսներին կազմակերպել «Համահայկական տնտեսական համախմբումի» առաջին համաժողովը։