Ինչո՞ւ եք գրում «քլաբ», դա մեր բառը չէ. Էրդողանը հանձնարարել է հեռացնել բոլոր օտարալեզու ցուցանակները

Թուրքիայի նախագահ Ռեջեփ Թայիփ Էրդողանը մասնակցել է թուրքերեն լեզվի վերաբերյալ իր նստավայրում կայացած միջոցառմանը:

Ըստ Ilerihaber-ի՝ Էրդողանը խիստ քննադատել է նրանց, ովքեր թուրքերենի փոխարեն օտարալեզու բառեր են կիրառում: «Դա ներկայանալի երևույթ չէ»,- նշել է նա:

Էրդողանը նշել է, որ նախկինում եղել են «քըրաթհանելեր» (արաբական ծագումով օսմանական բառ, որը նշանակում է ժամանցի վայր), իսկ այժմ դրանք վերածվել են «քլաբների» (գիշերային ակումբների):

«Ինչո՞ւ եք գրում «քլաբ», դա մեր բառը չէ, դրա փոխարեն ինչո՞ւ չեք օգտագործում թուրքականը: Բոլոր այդ ցուցանակները հանեք, դա ձեր իրավունքն է, բայց չեք կարողանում փոխել տալ: Բոլորը ինչ-որ մեկին հաճոյանալու ջանքեր են գործադրում»,- ասել է նա:

Էրդողանը հանձնարարել է երկրի քաղաքապետերին` հանել օտարալեզու բոլոր ցուցանակներն ու փոխարենը կախել թուրքալեզուները: