Բայց ես ե՞րբ ակտիվ չեմ եղել. Ծառուկյանն՝ ԱԺ-ում

Արդեն հայտնել ենք, որ այսօր մեկնարկել է 6-րդ գումարման ԱԺ  նստաշրջանը: Մինչ նիստի մեկնարկը «Ծառուկյան» դաշինքի ղեկավար Գագիկ Ծառուկյանը լրագրողների հետ զրույցում հստակ պատասխան չտվեց՝ իրենց խմբակցությունը ընդդիմադի՞ր է լինելու, թե՞ ոչ: «Կաշխատենք, կտեսնեք»,- ասաց նա:

Նրան օգնության եկավ Նաիրա Զոհրաբյանը և ասաց, որ պետք է շտապեն` նիստին մասնակցելու:

«Եթե մենք համապատասխան կոալիցիայի մեջ չենք, ուրեմն...»,- այդուհանդերձ, ասաց Ծառուկյանը:

Ինչ վերաբերում է «Ծառուկյան» դաշինքից պատգամավոր ընտրված, իսկ այնուհետև ինքնաբացարկ հայտնած անձանց, նա ասաց. «Շատ լավ է լինելու, դուք մի՛ անհանգստացեք: Խմբակցությունում կքննարկենք, նրանք բոլորն էլ մեր գործընկերներն են, աշխատել են, ճանապարհ են անցել: Ես երեկ իմ հարցազրույցում բոլոր հարցերի պատասխանները տվել եմ»:

Ծառուկյանը նաև հավաստիացրեց, որ կուսակցությունում կրքերը հանդարտվել են:

Հարցին` ակտի՞վ պատգամավոր է լինելու, նա պատասխանեց. «Բայց ե՞րբ ակտիվ չեմ եղել»: