15 հազար դրամի նախագիծը հակաիրավական նորմ չի պարունակում. Նիկոլ Փաշինյան

«Ելք» դաշինքից Երևանի քաղաքապետի թեկնածու Նիկոլ Փաշինյանը, դաշինքից Երևանի ավագանու թեկնածուներ Արայիկ Հարությունյանը և Դավիթ Խաժակյանն այսօր լրագրողներին ներկայացրեցին ընտրակաշառք չվերցնողներին Երևանի բյուջեից 15 հազար դրամ վճարելու նախագիծը:

Փաշինյանը նշեց, որ այդ ծրագիրը հակաիրավական նորմ չի պարունակում, 100%-ով համապատասխանում է օրենքի տառին: «Ընտրակաշառքի գործոնը քաղաքական ճգնաժամ է առաջացրել երկրում, ուստի մենք լուծումներ ենք առաջարկել` միևնույն ժամանակ պատրաստ լինելով քննարկել այլ առաջարկներ»,- ասաց նա:

Փաշինյանի խոսքով` Երևանի բյուջեն իրենց հաղթանակից հետո 30-40 մլրդ-ով կավելանա: «Եթե մեր ուղերձն ընդունեն երևանցիները, կնպաստեն, որ այդքանով ավելանա Երևանի բյուջեն: Այս իմաստով շատ արդյունավետ է, որ, մոտ 3 մլրդ դրամ ներդնելով, քաղաքն ունենա 37 մլրդ հավելյալ գումար»,- հայտարարեց նա:

Խոսելով, թե ինչ միջոցներով է Երևանի բյուջեն նշված չափով ավելանալու, Փաշինյանը օրինակ բերեց Երևան քաղաքում տեղադրվող նստարանները: «Այդ նստարանները գնվում են 160 հազար դրամով: Հիմա ատկատների չափերի մասին չեմ խոսի, բայց կան մարդիկ, ովքեր ասում են` 85 հազար դրամով դրանք կպատրաստեն»,- ասաց նա:

Փաշինյանը նաև նշեց, որ, քաղաքային իշխանության գալով, այնպես են անելու, որ բոլոր գծատերերը, այդ թվում` Տարոն Մարգարյանը, ավելի քիչ եկամուտներ ստանան: