Բայց ես ե՞րբ եմ բացակայել ԱԺ նիստերից որ. Ծառուկյանի զարմանքը

Այսօր Ծիծեռնակաբերդի հուշահամալիր էր այցելել նաեւ «Ծառուկյան» դաշինքի ղեկավար Գագիկ Ծառուկյանը: Անդրադառնալով լրագրողների դիտարկմանը, թե իր թիմակիցներն անհանգստացած են և սթրեսի մեջ են, քանի որ չգիտեն՝ մանդատ ունենալո՞ւ են, թե՞ ոչ, նա արձագանքեց. «Ամենակարևորն այն է, որ իմ թիմն անհանգստացած չէ, ես իմ բոլոր թիմակիցներից էլ շնորհակալ եմ: Լրագրողներն են սթրեսի մեջ, ձեր ցավը տանեմ, ոչ թե իմ թիմակիցները»:

Հարցին` այս անգամ է՞լ է շատ բացակայելու խորհրդարանի նիստերից, Ծառուկյանը զարմացրած արձագանքեց. «Բայց ես ե՞րբ եմ բացակայել որ»: Դիտարկմանը, թե նախորդ նիստերին ներկա չի եղել, հայտարարեց, թե «ժամանակը կգա, կտեսնեն»:

Խոսելով խորհրդարանական ընտրությունների ժամանակ իրենց ստացած ձայների մասին` Ծառուկյանն ասաց, որ իրենք կանխատեսում էին, թե ավելի լավ արդյունք է լինելու, այդուհանդերձ, գոհ է և' ձայն տվողներից, և' չտվողներից:

Հարցին` ընդդիմադիր դաշտո՞ւմ է գործելու, թե՞ իշխանական, պատասխանեց, որ ընդդիմադիր դաշտում գործելը չի նշանակում ցեխ շպրտել բոլորի վրա:

Խոսելով իր կողմից խոստացված 15 մլրդ դոլար ներդրումների մասին` Ծառուկյանն ասաց, որ այդ ներդրումները կլինեին, եթե իրենք հավաքեին 50+1 տոկոս ձայն: