Պրահայի հայ երիտասարդները լուռ բողոքի ակցիա են անցկացրել

Պրահայի հայ երիտասարդների միությունը Չեխիայի խորհրդարանից ոչ հեռու ապրիլի 20-ին անցկացրեց լուռ բողոքի ակցիա: Այս մասին  տեղեկացրեց Չեխիայի «Օրեր» (կայք էջը` orer.eu) եվրոպական անկախ ամսագրի գլխավոր խմբագիր Հակոբ Ասատրյանը. տեղեկացնում է Yerkirmedia-ն:

«Լուռ նստացույցի նպատակն է Չեխիայի իշխանությունների ուշադրությունը մեկ անգամ ևս հրավիրել Հայոց ցեղասպանության ճանաչման վրա»,- ասաց Հակոբ Ասատրյանը` նշելով, որ նամակներ են ուղարկվելու Չեխիայի խորհրդարանի անդամներին:

Նա նշեց, որ վերջին տարիներին Չեխիայում բավական լայն լուսաբանվում է Հայոց ցեղասպանության թեման, քաղաքական գործիչների կողմից այն հաճախ արծարծվում է:

«Կարծում եմ, որ խորհրդարանում արդեն հասունացել է Հայոց ցեղասպանության ճանաչման պահը, սակայն Չեխիան ներկայում որոշ խնդիրներ ունի Թուրքիայի հետ կապված: Ամեն դեպքում գտնում եմ, որ Չեխիայի կողմից Հայոց ցեղասպանությունը պաշտոնապես ճանաչելը ժամանակի հարց է»,- ասաց Ասատրյանը:

Հայոց ցեղասպանության 102-րդ տարելիցի կապակցությամբ Չեխիայի հայ համայնքը մի շարք միջոցառումներ է նախատեսել` պատարագ, երթ, ծաղիկների խոնարհում Հայոց ցեղասպանության զոհերի հիշատակը հավերժացնող հուշաքարի մոտ, դասական համերգ և այլն: