Պետք է շնորհակալություն հայտնենք նաև արդարադատության նախարարին. վարչապետ

Այսօր կառավարության նիստում տնտեսական զարգացման և ներդրումների նախարար Սուրեն Կարայանը ներկայացրեց մի շարք օրենքներում փոփոխություններ ու լրացումներ կատարելու մասին նախագծերի փաթեթը ընդունելու և ԱԺ քննարկմանը ներկայացնելու հարցը:

Առաջարկվող նախագծերի փաթեթը մշակվել է ՀՀ կառավարության որդեգրած՝ տնտեսական գործունեության պետական կարգավորման արդյունավետության բարձրացման, գործարար միջավայրի և շուկայական տնտեսության զարգացմանը խոչընդոտող դրույթների վերացման, պետության կողմից քաղաքացիներին և բիզնեսին մատուցվող ծառայությունների բարելավման և պարզեցման քաղաքականության համատեքստում: Վերոնշյալ նպատակների իրականացումը սերտորեն կապված է լիցենզավորման բնագավառում գործող նորմատիվաիրավական ակտերի կատարելագործման, ընթացակարգերի պարզեցման, ինչպես նաև մաքսային բնագավառի լիցենզավորման ենթակա գործունեության տեսակների լիցենզավորման պահանջը հանելու հետ:

Փաթեթով առաջարկվող երկրորդ կարգավորումը վերաբերում է լիցենզավորման ենթակա գործունեության որոշ տեսակների համար լիցենզավորման պահանջը հանելուն: Փաթեթով առաջարկվող լուծումների պարագայում  կառավարությունն այլևս չի նախատեսվի որպես լիցենզավորող մարմին, և վերջինիս վերապահված` լիցենզավորման լիազորությունը կիրականացվի կառավարության կողմից լիազորված համապատասխան պետական կառավարման մարմնի կողմից:

Նախագծի  ընդունմամբ ակնկալվում է տնտեսական գործունեություն ծավալելու պայմանների  բարելավման նպատակով լիցենզավորման բնագավառում առկա խնդիրների լուծում, ընթացակարգերի պարզեցում և տնտեսվարող սուբյեկտների ծախսերի կրճատում:

Կարայանի զեկույցից հետո վարչապետ Կարեն Կարապետյանը հարցրեց. «Պարո'ն Կարայան, լա՞վ որոշում ենք անում»: Նախարարը դրական պատասխան տվեց: Վարչապետը կրկին հարցրեց. «Շա՞տ լավ որոշում ենք անում»: Նախարարը կրկին դրական պատասխան տվեց:

«Բա Ձեր տոնայնությունից դա չենք զգում: Պետք է շնորհակալություն հայտնենք այս նախագիծը կազմողներին, այդ թվում` արդարադատության նախարարին: Մենք խնդիր ունենք, որովհետև բիզնես ոլորտը ուշ է տեղեկացվում այն փոփոխությունների մասին, որը մենք անում ենք»,- ասաց վարչապետը: