Թե ո՞ւր է Իշխան Զաքարյանը, իմացանք, կարո՞ղ է հնչել` «ո՞ւր է Յոլյանը» հարցը. Զուրաբյան

Այսօր ԱԺ հերթական քառօրյա նիստում քննարկվում է ՎՊ նախագահի թեկնածության հարցը: ՀՀ նախագահ Սերժ Սարգսյանն առաջադրել է  էներգետիկայի նախկին նախարար Լևոն Յոլյանի թեկնածությունը:

ՀԱԿ խմբակցության ղեկավար Լևոն Զուրաբյանը հարց ուղղեց նրան` ասելով, որ ՎՊ նախկին նախագահն իրականում ազատ ու անկաշկանդ չի գործել, իսկ անկախ գործելու առանձին երևույթները կասեցվել են:

«Պատահական չէ, որ տևական ժամանակ այստեղ թևածում էր մեկ հարց`ո՞ւր է Իշխան Զաքարյանը: Նա չէր գալիս ԱԺ, նրա փոխարեն տեղակալն էր գալիս` հաշվետվություններ ներկայացնում: Ձեր մասին այդ հարցը հնչելո՞ւ է` թե ո՞ւր է Յոլյանը: Իշխան Զաքարյանի դեպքում արդեն իմացանք` ուր է Իշխան Զաքարյանը, նա հանգրվանել է «Ծառուկյան» դաշինքի ցուցակի երկրորդ համարում»,- ասաց Զուրաբյանը:

Նա նաև հարցրեց, թե արդյո՞ք տաբուներ կան, որոնց մասին ՎՊ-ն հաշվետվություններ չի կարող ներկայացնել:

Լևոն Յոլյանը վստահեցրեց, որ իր անձի հետ կապված նման հարց չի առաջանա. ուր էլ լինի, տեղյակ կպահի Զուրաբյանին, իսկ տաբուներ չկան, և բոլոր պետական մարմինների դեպքում ՎՊ-ն կարող է ուսումնասիրություններ կատարել ու հաշվետվություն ներկայացնել: