Յոլյանը չպատասխանեց Իշխան Զաքարյանին վերաբերող հարցին

Այսօր ԱԺ քառօրյա նիստում քննարկվում էր ՎՊ նախագահի թեկնածությունը: ՀՀ նախագահի առաջարկով` ՎՊ նախագահի թեկնածու է առաջադրվել Լևոն Յոլյանը:

ԱԺ ՀԱԿ խմբակցության պատգամավոր Արամ Մանուկյանը հարց ուղղեց: «Դուք մտնում եք մի դաշտ, որտեղ հեշտ է շփոթվելը, թե որ ծայրից պետք է սկսել, որովհետև երկրում բոլոր ոլորտներում համատարած ձախողումներ են: Ո՞րն է լինելու ձեր քաղաքական մոտեցումը, թե որ ուղղությունից պետք է սկսել: Կունենա՞ք քաղաքական համարձակություն ինչ-որ բան անելու»,- հարցրեց նա:

Պատգամավորը նշեց նաև, որ Յոլյանը մի քանի ամիս աշխատել է որպես էներգետիկայի նախարար, ապա հարցրեց` արդյո՞ք հասցրել է նկատել այդ համակարգում տիրող համատարած կոռուպցիան, թերությունները` ուռճացրած ապարատ, գազի գին, հոսանքի գին: Մանուկյանը նաև ՎՊ պաշտոնաթող նախագահ Իշխան Զաքարյանի վերաբերյալ հարց ուղղեց` արդյո՞ք նա ձեռքերը թափ տվեց ու մտավ քաղաքականության մեջ, թե՞ դա ժամանակավոր փոխատեղում է:

Լևոն Յոլյանը պատասխանեց, որ էներգետիկայի նախարարի պաշտոնից հեռացել է բավարարվածության ու գոհունակության զգացումով: Էներգետիկայի ոլորտում էլ, կարծում է,  բավական շատ դրական տեղաշարժեր են արձանագրվել իր ղեկավարման ժամանակ: Իշխան Զաքարյանին վերաբերող հարցին Յոլյանը խուսափեց պատասխանել:

Արամ Մանուկյանն էլ արձագանքեց. «Շախմատում դու քայլ չես կարող չանել, բայց եթե չեք պատասխանում, Ձեր գործն է»:

«Իմ առջև երբեք տաբուներ չեն եղել»,- արձագանքեց Յոլյանը` ակնարկելով, որ ինքը կարող է ազատ գործել, բայց չի ցանկանում ժամանակ վատնել նախորդների սխալները ուղղելու վրա, այլ ցանկանում է առաջ նայել: Նա նշեց, որ ինքը որևէ կուսակցության անդամ չէ, և որ ՎՊ նախագահը չպետք է քաղաքական որևէ կուսակցության անդամ լինի: