Կուզեմ, որ համայնքապետերն արջի ծառայություններ չմատուցեն այս կամ այն քաղաքական ուժին. Դավիթ Լոքյան

ՀՀ տարածքային կառավարման և զարգացման նախարար Դավիթ Լոքյանը ցանկանում է, որ առաջիկա խորհրդարանական ընտրություններում մեր համայնքապետերն արջի ծառայություններ չմատուցեն այս կամ այն քաղաքական ուժին: Այսօր Հայաստանի համայնքների միության ընդհանուր ժողովում նա ասաց. «Ես կցանկանամ, որ մեր համայնքապետերը զերծ մնան այս խեղաթյուրված ընտրական պրոցեսներից և արժանապատվորեն իրենց քաղաքական հայացքներով գնան ընտրությունների և, եթե կողմնորոշելու են իրենց համայնքի ժողովրդին, դա անեն քաղաքական հստակ ձևակերպումներով ու ծրագրերով»:

Նախարարը համայնքապետերին հայտնեց, որ առաջիկա տարիներին մի քանի անգամ մեծացվելու են համայնքներ ուղղվող ներդրումային ծրագրերը, սուբվենցիան, միաժամանակ հորդորեց նախաձեռնողականություն ցուցաբերել` հաղթահարելու համայնքների առջև ծառացած խնդիրները: