Երիտասարդներ են, տաքարյուն են. Վահրամ Բաղդասարյանը` Մասիսում գրանցված միջադեպի մասին

ՀՀԿ խմբակցության ղեկավար Վահրամ Բաղդասարյանը Yerkir.am-ի հետ զրույցում անդրադառնալով Մասիս քաղաքում տեղի ունեցած դեպքերին, նշեց, որ երիտասարդներ են, տաքարյուն են և կարող է նաև նման դեպքեր պատահել:

Հարցին` մտավախություն չունե՞ն, որ նման դեպքերը շարունակական լինեն, որովհետև ռեյտինգային ընտրակարգը նաև ներկուսակցական պայքար է, նա արձագանքեց. «Այո, կա նման մտավախություն: Կոնկրետ երեկվա դեպքով իրավապահ մարմիններն արդեն զբաղվում են»:

«Բավականին մեծածավալ թվով աշխատողներ կան շտաբներում, բնականաբար, վերահսկողությունը կարող է մի փոքր դուրս գալ իր հունից, բայց ամեն դեպքում մենք պետք է ամեն ինչ անենք, որպեսզի նման դեպքեր այլևս տեղի չունենան»,- ասաց Բաղդասարյանը` հավելելով, որ իրենք կարող են հասնել այն բանին, որ լինի քաղաքակիրթ քարոզարշավ:

Նա վերջում նշեց, որ նմանատիպ միջադեպերն իրենք դատապարտում են:

Հիշեցնենք, որ երեկ միջադեպ է տեղի ունեցել Արարատի մարզի Մասիս քաղաքում: Նախընտրական կրքերն այնքան են թեժացել, որ ծեծկռտուք է սկսվել հանրապետական թեկնածուների թիմակիցների միջև: