Ասում եք` կնոջ նկատմամբ բռնություն, ես այդտեղ հայ կնոջ կերպար չտեսա. Վահրամ Բաղդասարյանը Երևանի ավագանիում միջադեպի մասին

ԱԺ ՀՀԿ խմբակցության ղեկավար Վահրամ Բաղդասարյանը պնդում է, որ Երևանի քաղաքապետարանում տեղի ունեցած միջադեպից մեկ օր առաջ Նուբարաշենի բնակիչների բողոքով այնտեղ են եղել քաղաքապետարանի և ՔԿՀ-ի ներկայացուցիչները, տեսել վիճակը: «Քաղաքապետարանը խնդրել է մեկ շաբաթ ժամանակ և անմիջապես տեխնիկա է տեղափոխել այնտեղ: Բնակիչները հավատացել են, որ խնդիրը կլուծվի: Դրանից հետո նրանց հանդիպել են ձեր ասած ակցիայի ներկայացուցիչները և ասել` չէ, ի՞նչ մեկ շաբաթ, նրանց չի կարելի վստահել, միացե'ք մեզ, մենք ակցիա պետք է անենք: Բնակիչները որևէ արձագանք չեն տվել, դրա համար էլ նրանք գնացել են այդ միջադեպին»,- լրագրողների հետ զրույցում ասաց պատգամավորը:

Դիտարկմանը` բնակիչներն են խնդրել այդ տարաները տանել քաղաքապետին, նա պատասխանեց. «Ճշտումները կկատարեք. տեխնիկայի աշխատելու պայմաններում ինչո՞ւ պիտի նման բան անեին, ուրեմն բնակիչների մեջ նրանք ունեցել են իրենց ներկայացուցիչը: Ի՞նչ է, չեմ հասկանում»:

Բաղդասարյանը նշեց, որ դա պարզապես միտում է, որ կարողանան ուշադրության կենտրոնում մնալ, այլ ոչ թե ակցիա: « Ասում եք` կնոջ նկատմամբ բռնություն, ես այդտեղ հայ կնոջ կերպար չտեսա: Դա անընդունելի է, կեղտաջուր շփել մարդկանց վրա»,- ասաց նա, ապա անդրադառնալով բռնությանը` ասաց. «Ես նմանատիպ երևույթները քննադատում եմ: Համենայն դեպս, դա միտում էր, որպեսզի խաթարեն բնականոն աշխատանքը»:

Հարցին` հնարավոր չէ՞ր առանց բռնություն կիրառելու անել ամեն ինչ, պատգամավորը պատասխանեց. «Դրանով կզբաղվեն իրավապահները»:

Բաղդասարյանը հավելեց. «Եթե ես տղամարդ եմ, պետք է ձեռքերս գրպանում դնեմ, դուք պետք է գաք, ինձ ապտակեք, ես էլ Աստվածաշունչ կարդացող մարդ եմ, մյուս այտս է՞լ պետք է դեմ անեմ»:

Դիտարկմանը` Մարինե Խաչատրյանն ասում է` իր հանդեպ սեռական ոտնձգություն է արվել, Բաղդասարյանն արձագանքեց, որ լկտիությունը պետք է չափ ունենա: «Սա ամբողջ հայոց պատմության մեջ առաջին դեպքն է, որ քաղաքական դաշտում նման հայտարարություն են անում»,- ասաց նա:

Իսկ թե ո՞վ պետք է պատասխանատվության ենթարկվի այս դեպքում, պատգամավորը նշեց` իրավապահները կպարզեն: