«Շատ վատ հարց ա». ինչպես ՀՀԿ-ականներն արձագանքեցին ընդդիմություն դառնալու հարցին

Ոչ ոք չի էլ մտածում այն մասին, թե Հանրապետական կուսակցությունը կարող է այս խորհրդարանական ընտրություններից հետո լինել ոչ թե իշխանություն, այլ, չապահովելով համապատասխան ձայներ, խորհրդարանում հանդես գալ որպես ընդդիմություն: Yerkir.am-ը հանրապետականներից փորձել է պարզել` արդյո՞ք հարազատ կուսակցությանը պատկերացնում են ընդդիմադիր դաշտում, և ինչպիսի՞ ընդդիմություն կլինի ՀՀԿ-ն:

Գեներալ Սեյրան Սարոյանը, լսելով հարցը, ասաց. «Չեմ կարա հարցերի պատասխանել, զբաղված եմ, հետո զանգի»:

Առաքել Մովսիսյանն այսպես արձագանքեց մեր հարցին. «Շատ վատ հարց ա, ես տենց հարցերի չեմ պատասխանում, էդ ի՞նչ հարց ա»:

Իսկ ահա Համլետ Հարությունյանը նշեց. «Գնացեք, այդ հարցը նրանց ուղղեք, ովքեր պատգամավորական թեկնածուներ են»: Մեր հարցին` նեղացա՞ծ է հանրապետականներից, չպատասխանեց, նախընտրեց անջատել հեռախոսը:

Հանրապետական կուսակցության «հնաբնակներից» Մկրտիչ Մինասյանն էլ ասաց, որ նման բան դժվար է մոտ ապագայում պատկերացնել, բայց եթե, այնումենայնիվ, այդպիսի բան լինի, ապա Հանրապետականը կլինի կառուցողական ընդդիմություն:

Հարկ է նշել, որ կարկառուն հանրապետականներն անգամ չեն էլ մտածում նման զարգացումների մասին և ուղղակի համոզված են, որ իրենց կուսակցությանը նման «վտանգ չի սպառնում»:

Ամալյա Առաքելյան