Արա Օսկանյանի ձերբակալումը քաղաքական ենթատեքստ չունի. պաշտպան

Վերջերս ձևավորված ՕՐՕ դաշինքի անդամ Վարդան Օսկանյանի որդու՝ Արա Օսկանյանի ձերբակալումը քաղաքական ենթատեքստ չունի, սակայն եթե այսօր դատարանը նրա նկատմամբ կալանքի որոշում կայացնի, այդ ժամանակ հաստատ քաղաքական էլեմենտ կտեսնենք. Yerkir.am-ին ասաց Արա Օսկանյանի պաշտպան Տիգրան Աթանեսյանը՝ նշելով, որ իր պաշտպանյալը կասկածվում է միջին ծանրության հանցագործություն կատարելու մեջ, ինչը որևէ կերպ հիմնավորված չէ:

Նշենք, որ Օսկանյանի որդին և նրա ընկերը՝ Հրանտ Սիրադարյանը, այժմ գտնվում են Աբովյան քաղաքի ձերբակալվածների պահման վայրում: Այսօր` ժամը 18:00-ին, լրանում է Արա Օսկանյանի ձերբակալման 72 ժամը, և Կոտայքի մարզի ընդհանուր իրավասության առաջին ատյանի դատարանը պետք է որոշի երիտասարդի խափանման միջոցի ընտրության հարցը:

Աթանեսյանը հայտնեց, որ իր պաշտպանյալն արդեն առերեսվել է իր դեմ ցուցմունք տված անձի հետ, սակայն քննչական գործողության վերաբերյալ մանրամասներ չհայտնեց: Նրա խոսքով՝ կատարվածը քրեական հանցագործության հատկանիշներ չի պարունակում:

Ի դեպ, պարզվում է` Արա Օսկանյանի հետ ձերբակալված Հրանտ Սիրադարյանը 18 տարեկան է և ավագ դպրոց է հաճախում: Փաստաբանի խոսքով՝ տղան քննիչներին խնդրել է իրեն ազատ արձակել, որպեսզի դպրոց գնա: Սիրադարյանի շահերը ներկայացնում է փաստաբան Արմեն Սողոմոնյանը:

Ավելի վաղ հայտնել ենք, որ 2017թ. փետրվարի 17-ին ոստիկանությունից ստացվել են քաղաքացու հաղորդման հիման վրա նախապատրաստված նյութերն առ այն, որ 2017թ. փետրվարի 16-ին իր ընկեր Հ.Սիրադարյանը, և նրա հորաքրոջ որդին` Ա.Օսկանյանը, իրենից պահանջել են վերադարձնել պարտքի գումարը, որի ընթացքում իր կամքին հակառակ իրեն պահել են ավտոմեքենայի մեջ և թույլ չեն տվել դրանից դուրս գալ` առողջության համար վտանգավոր բռնություն գործադրելու սպառնալիքներ հնչեցնելով:

Դեպքի առթիվ ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժնում հարուցվել է քրեական գործ` ՀՀ քրեական օրենսգրքի 133-րդ հոդվածի 2-րդ մասի 1-ին և 2-րդ կետերով:

Քննությամբ ձեռք բերված նախնական տվյալներով` փետրվարի 16-ին` ժամը 17:00-ի սահմաններում, Երևան քաղաքի Լենինգրադյան փողոցի «Ռոբերտո» խանութ-սրահի հարակից հատվածից Ն.Բերբերյանին նստեցրել են ավտոմեքենայի մեջ, գնացել Աբովյան քաղաք և, նրա կամքին հակառակ և առողջության համար վտանգավոր բռնություն գործադրելու սպառնալիքներ հնչեցնելով, ապօրինաբար զրկել ազատ տեղաշարժվելու իրավունքից և պահանջել վերադարձնել 1.500.000 ՀՀ դրամ պարտքը:

Փետրվարի 17-ին Ա.Օսկանյանը և Հ.Սիրադարյանը ձերբակալվել են՝ ՀՀ քրեական օրենսգրքի ՀՀ քրեական օրենսգրքի 133-րդ հոդվածի 2-րդ մասի 1-ին և 2-րդ կետերով նախատեսված հանցավոր արաք կատարելու կասկածանքով: