Միջերկրական ծովում միգրանտներով նավի կործանման հետևանքով 180 մարդ է զոհվել

Միջերկրական ծովում միգրանտներով նավի կործանման հետևանքով մոտ 180 մարդ է զոհվել, հայտնել են Միգրացիայի միջազգային կազմակերպությունից, փոխանցում է РИА Новости-ն:

«Ողջ մնացածների վկայություններով հաստատվում է, որ շաբաթ օրը նավի կործանման հետևանքով մոտ 180 մարդ է զոհվել», - Twitter-ում գրել է կազմակերպության պաշտոնական ներկայացուցիչ Ֆլավիո լի Ջակոմոն:

Միգրացիայի միջազգային կազմակերպությունը հունվարին հայտնել է, որ 2016 թվականին Միջերկրական ծովը հատելու և Եվրոպա հասնելու փորձերի ժամանակ ավելի քան 5 հազար միգրանտ է զոհվել, մոտ 363 հազար մարդ եվրոպական երկրներ է հասել:

Ավելի վաղ հաղորդվել է, որ պատահարը տեղի է ունեցել Լիբիայի ափից մոտ 50 կմ հեռավորությամբ: Ժամեր տևած որոնումներից հետո փրկվել է միայն 4 մարդ: Նախապես ենթադրվում էր, որ նավում մոտ 110 մարդ է եղել: