Քննարկվեց ընտրությունների ժամանակ ոստիկանության գործողությունների նորացված ուղեցույցը

Այսօր ՀՀ ոստիկանությունում տեղի ունեցավ «Ընտրությունների ժամանակ ոստիկանության գործողությունների ուղեցույց»-ի լրացված նախագծի հանրային քննարկումը: Քննարկմանը ներկա էին հասարակական կազմակերպությունների և լրատվամիջոցների ներկայացուցիչներ:

Ուղեցույցում ներկայացված են ընտրությունների ընթացքում ոստիկանության գործառույթները, մասնավորապես` ընտրատեղամաս գործուղվող ոստիկանության ծառայողների պարտականությունները և այլն:

Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցն առաջարկեց նախագծի մի շարք կետերում հստակություններ մտցնել: Մասնավորապես, ըստ նրա, պետք է կոնկրետ նկարագրվի այդ ընթացքում ոստիկանների կողմից հարկադրանք կիրառելու կարգը, օրինակ` ի՞նչ եղանակով պետք է խախտում կատարած և հանձնաժողովի ղեկավարի հրահանգներին չենթարկվող անձին հեռացնեն ընտրատեղամասից և այլն:

Նրա խոսքով՝ լավ կլինի, որ ոստիկանության օպերատիվ խմբի ծառայողներն այդ օրը կիրառեն տեսախցիկներ, որպեսզի որոշ դեպքերում ֆիքսեն խախտումները:

Սաքունցն առաջարկեց քննարկումներ կազմակերպել, որոնց ընթացքում իրենք ոստիկաններին կներկայացնեն ընտրություններին նախորդող ժամանակահատվածում իրականացվող խախտումները բացահայտելու` իրենց փորձը:

Քննարկման ընթացքում բարձրաձայնվեց ընտրակաշառք բաժանելու և դրա բացահայտման ուղղությամբ ոստիկանության կատարած աշխատանքների մասին: ՀՀ ոստիկանության շտաբի պետ Հովհաննես Քոչարյանի խոսքով՝ ընտրակաշառքի դեպքերը հնարավոր է բացահայտել հանրության աջակցությամբ, թեև, ըստ նրա,  ոստիկանությունը չի սպասելու ահազանգերին, ինքն էլ է հետամուտ լինելու նման երևույթների բացահայտմանը:

«Ընտրությունների ժամանակ ոստիկանության գործողությունների ուղեցույցի» նախագծին կարող եք ծանոթանալ հետևյալ հղմամբ: