Առաջարկը ՀՀԿ-ից է եղել. Արագած Ախոյան

ԱԺ պատգամավոր Արագած Ախոյանը Yerkir.am-ի հետ զրույցում ասաց՝ իր կողմից իրականացվելիք գործառույթները լիարժեք կյանքի կոչելու ամար պետք է իշխանության հետ համագործակցի: Եվ ահա այս հանգամանքը նկատի ունենալով՝ նա պատրաստվում է առաջադրվել Արագածոտնի մարզի  ՀՀԿ տարածքային ընտրական ցուցակով, միայն թե, ըստ պատգամավորի, այդ հարցի վերջնական լուծումը կլինի առաջիկա երկու-երեք օրվա ընթացքում:

«Իհարկե, անպայման առաջադրվելու եմ, բայց մի քանի օրից ավելի հստակ  պարզ կլինի: Էս ընթացքում բոլորը բանակցությունների մեջ են տարբեր ուժերի հետ, այդ բանակցողներից մեկն էլ ես եմ»,- ասաց նա:

Ախոյանի խոսքով՝ առաջարկը ՀՀԿ-ից  եղել է:

Հարցին՝ ռեյտինգային ընտրակարգով առաջադրվելու դեպքում նաև ՀՀԿ-ակա՞ն է պատրաստվում դառնալ,  պատասխանեց՝ ոչ, ապա նշեց. «Հետագան ցույց կտա, դրա մասին դեռ չեմ մտածել»:

Ախոյանից հետաքրքրվեցինք՝ առաջիկա երկու-երեք օրերի ընթացքում ի՞նչ քաղաքական դասավորումներ են լինելու, որ հստակություն լինի նրա հետագա գործողություններում: Պատասխանեց. «Ամեն ինչ սաղմնային փուլում է: Դեռ պետք է լինի ռեյտինգայինով առաջադրվողների ցուցակ, դեռ  պարզ չէ՝ ովքեր ունեն ցանկություն առաջադրվելու, ոչինչ դեռ պարզ չէ»:

Ախոյանն ասաց նաև, որ յուրաքանչյուր կուսակցություն, այդ թվում` ՀՀԿ-ն, պետք է  ամեն ինչ անի, որ ներքին մրցակցություն չլինի, քանի որ դա կարող է վնաս հասցնել հենց կուսակցությանը:

Հիշեցնենք, որ Ախոյանը ԱԺ ԲՀԿ խմբակցության կազմում է: