Ինչո՞ւ նոր կուսակցություն բացել, եթե կարելի է որևէ մեկի հետ համագործակցել. Արագած Ախոյան

ԱԺ պատգամավոր Արագած Ախոյանը Yerkir.am-ի հետ զրույցում ասաց, որ իր` նոր Ընտրական օրենսգրքի նախագծի քննարկումներին չմասնակցելը պայմանավորված է նրանով, որ ինքն այս օրերին զբաղված է մեկ այլ կարևոր գործով: Նա նախ ընդգծեց, թե նորմալ է, որ քննարկման դահլիճում 131 հոգի չի լինում: «Մարդիկ զբաղված են այլ խորհրդարանական գործերով, այդ թվում` նաև ես: Դա պայմանավորված չէ Ընտրական օրենսգրքի նկատմամբ իմ անտարբերությամբ: Ապրիլ ամսին երեք գործուղում կա պլանավորված:  Հայոց ցեղասպանության  101-րդ տարելիցի  կապակցությամբ ամսի 23-ին ֆորում կա, դրանով ենք զբաղված»,- ասաց պատգամավորը` հավելելով, որ հանդիպումներ կունենա նաև նրանց հետ, ովքեր ավելի շատ են տեղեկացված Ընտրական օրենսգրքի դրույթներից:

Ախոյանը խոսեց նաև իր առաջիկա քաղաքական հանգրվանի մասին: «Շատ տխուր եմ ընդունում այն  փաստը, որ մարդիկ հայտնվում են ինչ-որ կուսակցությունում: Կուսակցությունում չեն հայտնվում, պետք է լինել գաղափարակից: Ընտրական օրենսգրքով հենց այդ հարցերը կբարձրանան, և կուսակցության դերն ու նշանակությունն ավելի կմեծանա»,- ասաց նա և հավելեց, որ չի պատրաստվում անդամակցել Վարդան Օսկանյանի կուսակցությանը:

Հարցին` հնարավո՞ր է ինքներդ կուսակցություն ստեղծեք, քանի որ առաջիկա խորհրդարանական ընտրություններին մասնակցելու համար պետք է որևէ կուսակցության անդամագրվեք, Ախոյանը պատասխանեց. «Կարծեմ` 70-ից ավելի կուսակցություններ կան, և չէի ցանկանա նմանատիպ բանի մասին նույնիսկ մտածել: Լուրջ կուսակցություններ կան, ինչո՞ւ  նորը բացել, եթե կարելի է որևէ մեկի հետ համագործակցել: Կոնկրետ թեկնածուներ, որոնց հետ կարող եմ համագործակցել, մի քանիսն են: Կան մի քանի առաջարկներ, բայց չեմ կարող ասել` որ կուսակցություններից են այդ առաջարկները»: