Դա կարող է դիտվել որպես վրեժխնդրություն լրագրողական գործունեության համար. ՀՀ ՄԻՊ-ը` Լապշինի գործի մասին

Այսօր լրագրողների հետ զրույցում ՄԻՊ Արման Թաթոյանն անդրադարձավ Բելառուսի կողմից բլոգեր Լապշինին Ադրբեջանին արտահանձնելու հարցին: Հիշեցնենք, որ Բելառուսը որոշում է կայացրել բավարարել Ադրբեջանի պահանջը և Ռուսաստանի ու Իսրայելի քաղաքացի, բլոգեր Ալեքսանդր Լապշինին արտահանձնել նրան: Հայտնի բլոգերն Արցախ այցելելուց հետո հայտնվել էր Ադրբեջանի «սև ցուցակում»: Այնուհետև նա այցելել էր Բաքու ուկրաինական անձնագրով: Այսպիսով՝ Ադրբեջանում որոշում է կայացվել քրեական պատասխանատվության ենթարկել բլոգերին:

Արման Թաթոյանը նշեց, որ ԵԱՀԿ զանգվածային լրատվության միջոցների ազատության հարցերով հանձնակատարը իրեն նամակ է հղել, որում ասել է, որ Լապշինի արտահանձնումը կարող է լուրջ խնդիրներ ստեղծել: ՄԻՊ-ը շատ ակտիվ զբաղվում է այդ հարցով: Արման Թաթոյանի խոսքով` շեշտը դրվում է այն բանի վրա, որ Լապշինի արտահանձնումը կարող է լուրջ խնդիրներ ստեղծել մարդու իրավունքների, այդ թվում` ԼՂ հակամարտության լուսաբանման գործում լրագրողների իրավունքների հետ կապված

«Դա կարող է դիտվել որպես  լրագրողների իրավունքների խախտում, դա կարող է դիտվել նաև որպես  վրեժխնդրություն լրագրողական գործունեություն իրականացնելու համար: Այստեղ շեշտադրվում է խոսքի ազատության իրավունքը, ԼՂՀ-ում լրագրողների աշխատանքի հարցը,  փորձագետների անվտանգ աշխատանքը: Սրանից հետո ավելի պետք է ակտիվացնենք միջազգային լրագրողների այցը Արցախ»,- ասաց Արման Թաթոյանը: