Վարչապետը քրեակատարողական հիմնարկների վերաբերյալ հանձնարարականներ տվեց

Այսօր կառավարության նիստում վարչապետ Կարեն Կարապետյանը հանձնարարական տվեց ՔԿՀ-ների վերաբերյալ:

«Քրեակատարողական համակարգի ներկայիս վիճակը բավականին հարցեր է առաջացնում: Արդարադատության նախարարի կողմից պարբերաբար ներկայացվող տեղեկատվության արդյունքներից պարզ է դառնում, որ կան խնդիրներ կալանավորվածների, դատապարտյալների սննդի ապահովման տեսանկյունից: Կան կոռուպցիոն ռիսկեր հանձնուքների տրամադրման հարցում, ինչպես նաև խնդիրներ կան դատապարտյալների հավասարաչափ տեղաբաշխման հարցում: Խնդիրները պահանջում են համակարգային ու հստակ լուծումներ»,- ասաց նա:

Հանձնարարվեց արդարադատության նախարարին` ուսումնասիրել ՔԿՀ-ներին վերապահված որոշ գործառույթներ, մասնավորապես` կալանավորվածներին ու դատապարտյալներին տրամադրվող սննդի ապահովումը, այդ թվում` մասնավոր կազմակերպություններին պատվիրակելու հնարավորությունը: Մշակել հանձնուքների տրամադրման գործընթացում կոռուպցիոն ռիսկերը նվազագույնի հասցնելու գործիքակազմեր: Ապահովել ՔԿՀ-ներում դատապարտյալների հավասարաչափ տեղաբաշխման, բոլոր ռեսուրսների օգտագործումը` ուղղված թե'  Արմավիրի նորաբաց ՔԿՀ-ի ամբողջական շահագործմանը, թե' ՔԿՀ ծառայողների քանակական բաշխմանը: Ձեռնարկված միջոցառումների վերաբերյալ զեկուցել կառավարությանը մեկամսյա ժամկետում: