Կպարզեցվի դեղատնային գործունեության, բժշկական օգնության և սպասարկման լիցենզավորման կարգը

 Կառավարության վաղվա նիստի օրակարգում առողջապահության նախարարությունը ներառել է կառավարության որոշման փոփոխություն, որի նպատակն է նպաստել բնակչության դեղորայքային ապահովման բարելավմանը, փոքրացնելով, կրճատելով դեղատների, դեղատնային կրպակների սահմանված տարածքների չափերը:

Հանգստի սենյակի պարտադիր պահանջը հանվել է` 8 քառ.մ տարածքի կրճատում, վտանգավոր թափոնների պահպանման  համար նախատեսված տարածքի պարտադիր պահանջը մեղմացվում է` և պահանջվում է վտանգավոր թափոնների պահպանման  սենյակ կամ պահարան կամ արկղ, սանհանգույցի տարածքի` նախկինում 2 քառ. մետր  չափի պարտադիր պահանջը հանվում է,  իսկ մարզերի քաղաքային և գյուղական համայնքներում սանհանգույցի առկայության պարտադիր պահանջն է հանվում,  եթե ներկայացվում է տեղեկանք լիազոր մարմնից` կենտրոնացված կոյուղու բացակայության մասին:

Նախատեսվում է դեղատների`  դեղերի ստերիլիզացման սենյակ նախկինում 10 քառ. մետր, սենյակի պարտադիր պահանջի հանում, դեղատոմսերի ընդունման և պատրաստված դեղերի բացթողման բաժին` նախկինում  7 քառ. մետր սենյակի պարտադիր պահանջի հանում, ասիստենտական սենյակ` նախկինում 8 քառ. մետր տարածքի չափի հանում, փաթեթավորման սենյակ լվացարանով` նախկինում 4 քառ. մետր տարածքի չափի հանում, ստերիլ դեղերի պատրաստման սենյակ` 10 քառ. մետր սենյակի պարտադիր պահանջի հանում, ամանեղենի մանրէազերծման սենյակ` 6 քառ. մետր սենյակի պարտադիր պահանջի հանում,  պահեստ` 15 քառ. մետր սենյակի պարտադիր պահանջի հանում, շշերի պահպանման սենյակ` 6 քառ. մետր սենյակի պարտադիր պահանջի հանում,  դեղափոշիների պահպանման սենյակ` 8 քառ. մետր սենյակի պարտադիր պահանջի հանում, տնտեսական ապրանքների պահպանման սենյակ` 2 քառ. մետր սենյակի պարտադիր պահանջի հանում, սենյակների հագեցվածությունների կրճատում:

Կանաչ խաչի նշանի մասով՝ նախատեսվում են հստակեցումներ՝ կապված դրանց ստանդարտների, լուսավորության ռեժիմի և տեղադրման ձևի հետ:  Ինչպես նաև ի բարօրություն նախկինում լիցենզավորված դեղատների, դեղատնային կրպակների, որոնց տարածքների հատակագծերը ուսումնասիրելիս, գերակշռող մասի մոտ հայտնաբերվել է չափսերի անհամապատասխանություն գործող կարգի հետ, կատարվող  փոփոխությունները կնպաստեն դրանց հետագա աշխատանքային գործունեությանը:

Նախագծի հիմնական խնդիրը Հայաստանի Հանրապետությունում դեղատնային գործունեության,  բժշկական օգնության և սպասարկման լիցենզավորման կարգի հեշտացումն ու պարզեցումն է: