Զորամասի բուժկետում մահացած զինծառայողը նորակոչիկ էր, հայրն էլ զինվորական է

Արդեն հայտնել ենք, որ երեկ՝ հունվարի 26-ին, ՀՀ ՊՆ N զորամասի պարտադիր ժամկետային զինծառայող, կուրսանտ Սարգիս Սամվելի Ափինյանի ինքնազգացողությունը զորամասի շարահրապարակում կտրուկ վատացել է: Ս.Ափինյանը տեղափոխվել է զորամասի բուժկետ, որտեղ ժամը 17:35-ի սահմաններում գրանցվել է կենսաբանական մահ:

Սարգիս Ափինյանը Արմավիրի մարզի Մյասնիկյան գյուղից էր: Մյասնիկյան համայնքի ղեկավար Տիգրան Բաղդասարյանը  Yerkir.am-ին հայտնեց, որ տղան որևէ առողջական խնդիր չի ունեցել, և գյուղում բոլորը զարմացած են՝ ինչով կարող է պայմանավորված լինել նրա հանկարծամահ լինելը: «Հայրն էլ զինվորական է, նորմալ աշխատող-ապրող ընտանիք է: Սարգիսը միակ տղան էր, ուներ նաև երկու քույր: Չգիտեմ, չեմ կարող ասել՝ ինչպես է նման բան եղել: Տղայի մարմինն այսօր կբերեն գյուղ»,- ասաց գյուղապետը:

Նրա խոսքով՝ Սարգիս Ափինյանն օրերս էր զորակոչվել բանակ: «Մի տասն օրվա ծառայող էր, նոր էր գնացել բանակ»,- ասաց Բաղդասարյանը: