Չի բացառվում՝ փետրվարին կրկին սառնամանիքներ լինեն. Գագիկ Սուրենյան

ՀՀ ԱԻՆ «Հիդրոմետ» ծառայության օդերևութաբանության կենտրոնի պետ Գագիկ Սուրենյանն այսօր լրագրողներին տեղեկացրեց, որ Միջերկրական ծովից մեր տարածաշրջանին է մոտենում հզոր ցիկլոն:

Մինչ առաջիկա եղանակային փոփոխությունների մասին խոսելը, նա ասաց, որ հարյուր տարվա կտրվածքով հազվագյուտ երևույթ է այն, որ Արարատյան դաշտում մառախուղի տևողությունը հասավ 40 օրվա: «Այսպիսի դեպք հարյուր տարվա մեջ եղել է հինգ անգամ»,- ասաց Սուրենյանը՝ հավելելով, որ հունվար ամսին եղել են բազմաթիվ տաք օդային ալիքներ, որոնք, սակայն, որևէ ազդեցություն չեն ունեցել Արարատյան դաշտի եղանակի վրա:

«Բայց եղել են տարածքներ, որտեղ գրանցվել է բավականին բարձր ջերմային ֆոն: Մեղրի, Կապան, Ագարակ հատվածում օդի ջերմաստիճանը հասել է մինչև պլյուս 17-ի, Տավուշում՝ պլյուս 15 աստիճանի, լեռնային շրջաններում ցերեկային ժամերին օդի ջերմաստիճանը հասել է պլյուս 4-5-ի»,- ասաց Սուրենյանը՝ հավելելով. «Ասել, որ Արարատյան դաշտում այս տարի արձանագրվել է խիստ ձմեռ, սխալ կլինի, քանի որ խիստ ձմեռ է համարվում, երբ օդի ջերմաստիճանն ամսվա ընթացքում հասնում է մինուս 20-25-ի, իսկ առանձին օրերի՝ մինչև մինուս 30 աստիճանի , սակայն Երևանում և Արարատյան դաշտում, առհասարակ, ամենացածր ջերմաստիճանը եղել է -18 աստիճան»:

Մասնագետը բացատրեց՝ ինչով էր պայմանավորված ցրտի սաստիկ զգացողությունը: «Ցուրտը սարսափելի էր թվում, որովհետև կա երկու գործոն` կա ջերմաստիճան և զգացողական ջերմաստիճան: Զգացողական ջերմաստիճանը կախված է օդի խոնավությունից, բարձր խոնավություն դեպքում ջերմաստիճանը 5-6 աստիճանով ավելի ցուրտ է ընկալվում, քան փաստացի ջերմաստիճանը: Մինուս 12-ը կարող է ընկալվել մինչև մինուս 18 աստիճան: Երկրորդ գործոնն էլ արևի լույս բացակայությունն է»,- ասաց նա:

Սուրենյանի խոսքով՝ Միջերկրական ծովից մեր տարածաշրջանին մոտենում է հզոր ցիկլոն: «Այսօր առավոտյան արդեն զգացվում է ցիկլոնի ազդեցությունը` ջերմաստիճանի բարձրացում կա, որը դեռ Արարատյան դաշտ չի հասել: Երեկվա հետ համեմատած` օդի ջերմաստիճանը շատ շրջաններում 10-15 աստիճանով բարձրացել է, ուժեղ տաք օդի ներհոսք է գալիս դեպի հանրապետություն: Որոշ հատվածներում նույնիսկ դրական ջերմաստիճան է գրանցվել գիշերվա ընթացքում»,- նշեց նա:

Ըստ Սուրենյանի` այսօր կեսօրից հետո արդեն կզգացվի հզոր ցիկլոնի ազդեցությունը: «Այսօր և վաղը գտնվելու ենք ցիկլոնի ազդեցության ծայրամասերում, ինչով պայմանավորված` տեղումների ինտենսիվությունը կլինի թույլ: Հունվարի 26-ի լույս 27-ի գիշերը մոտնում է ցիկլոնի կենտրոնը: Հունվարի 27-ին, 28-ին գտնվելու ենք ցիկլոնի ազդեցության գոտում, բոլոր շրջաններում համատարած կտեղա ձյուն, լեռնային շրջաններում կլինի բուք, ցածր հորիզոնական տեսանելություն, ճանապարհներին` մերկասառույց»,- հայտնեց նա:

Սուրենյանի խոսքով՝ հունվարի 29-ին նախորդող գիշերը տեղումները կպահպանվեն, իսկ առավոտյան արդեն ցիկլոնը կսկսի ուժը կորցնել, և տեղումների ինտենսիվությունը կփոքրանա ու հունվարի 30-ին դուրս կգա մեր հանրապետոթւյուն տարածքից: «Հունվարի 26-27-ն ընկած ժամանակահանտվածում օդի ջերմաստիճանը ևս 8 աստիճանով կբարձրանա: Փետրվարի համար ջերմաստիճանի կտրուկ բարձրացումներ պետք չէ ակնկալել: Պարզեցումից հետո օդի ջերմաստիճանը կնվազի, չի բացառվում, որ կրկին կլինեն սառնամանիքներ»,- եզրափակեց Սուրենյանը: