Ամբողջությամբ բացահայտեք Դինքի սպանությունը. «Լրագրողներ առանց սահմանների»

«Լրագրողներ առանց սահմանների» կազմակերպության՝ Գերմանիայի կառույցի նախագահ Քրիստիան Միհրը Բեռլինում իր ելույթի ընթացքում ուշագրավ հայտարարություններ է արել «Ակօս» թերթի խմբագիր Հրանտ Դինքի սպանության վերաբերյալ:

Ըստ Demokrathaber-ի՝ Միհրն իր ելույթում նշել է, որ Դինքի սպանությունը փոքր ֆանատիկոս խմբավորման գործունեություն չի եղել: Նա շեշտել է Դինքի սպանության հետևում կանգնողներին դատական պատասխանատվության ենթարկելու կարևորությունը` կոչ անելով քաղաքական նպատակներով դատական գործընթացն աչքաթող չանել:

Կազմակերպությունը Դինքի սպանության 10-րդ տարելիցի կապակցությամբ իր հայտարարության մեջ նաև կոչ է արել «ի վերջո, ամբողջությամբ բացահայտել Դինքի սպանությունը»:

Նշենք, որ այսօր լրանում է «Ակօս» թերթի խմբագիր Հրանտ Դինքի դավադիր սպանության 10-րդ տարելիցը: Մինչ օրս նրա սպանությունն ամբողջովին բացահայտված չէ, իսկ մեղավորները շարունակում են մնալ անպատիժ: