Սեյրան Օհանյանի կուսակցության ստեղծումն առասպել է. քաղաքագետ

Քաղաքագետ Սերգեյ Շաքարյանցն այսօր լրագրողներին կարծիք հայտնեց, որ, քաղաքական առումով, 2016 թվականին 99 տոկոսով բացասական գնահատական է պետք տալ: Ըստ քաղաքագետի՝ 2017 թվականը ևս հարթ տարի չի լինելու, ինչին նպաստում են ինչպես իշխանական թևի ներկայացուցիչները, այնպես էլ՝ ընդդիմադիր: «Մենք չունենք իրական ընդդիմություն, նրանք մոռացել են, որ իրենց սեփական ազգը լուրջ հիշողություն ունի»,- ասաց նա՝ հավելելով. «Քաղաքական խոհանոցիկներում որոշում են` այս տարի դու ես գալիս քաղաքականություն, նրա համար, որ Աստված չանի, իսկական ընդդիմությունը չգա»:

Շաքարյանցի խոսքով՝ ամեն ինչ արվում է, որ բոլորի ուշքն ու միտքը բևեռվի պաշտպանության երկու նախարարների վրա: «Խոսքը պաշտպանության ներկայիս և նախկին նախարարի մասին է: Տարածում են, որ նախկինը շուտով կուսակցություն կստեղծի, և շատերն են գնում-միանում նրան: Սա առասպել է: Եթե անգամ Օհանյանը ծախի իր ընտանիքի ունեցած-չունեցածը, էդ ռեսուրսներով չի կարող ստեղծել կայուն, լուրջ կուսակցություն: Ցանկացած տեղ ասեք, որ դաշինքի կորիզ հանդիսացող կուսակցությունը մի քանի օրվա ընթացքում են ստեղծել, ձեզ կանպատվեն»,- նշեց քաղաքագետը՝ ընդգծելով, որ Ծառուկյանի՝ քաղաքականություն վերադարձն էլ հսկվում է իշխանական ուժերի կողմից. «Մենք չգիտենք՝ ում վրա է ընկնելու ջոկերի դրոշը, դեռ հայտնի չէ, բայց այս պահի դրությամբ ամեն ինչ նույնն է, նոր դեմքեր չկան: Ոչ մի բան չի լինի Ծառուկյանի վերադարձով. մեր իշխանական ոլորտի, այսպես կոչված, կառուցողական գործընկերը նույն նախագահի խնդրանքով է վերադառնում քաղաքականություն»:

Շաքարյանցի խոսքով՝ իրական այլընտրանք չկա, լուրջ քաղաքական ուժ չկա մեր քաղաքական դաշտում, իսկ իշխանությանը լուրջ այլընտրանք, լուրջ ընդդիմություն կարող են լինել միայն դրսից եկած ուժերը: «Կարող է լինել նաև Չինաստանի ուժերի ներկայացուցիչ, Պարսկաստանի, կապ չունի՝ ով է, անունն էլ կարող է տարբեր լինել` «Լուսավոր Հայաստան», «Մշուշոտ Հայաստան», «Շատ հայրենասեր Անդրանիկի կուսակցություն» և այլն»,- ասաց Շաքարյանցը՝ վրդովմունք հայտնելով այն կապակցությամբ, որ Հայաստանի անունը շատ է շահարկվում և ներառվում կուսակցությունների անունների մեջ, ինչը, ըստ նրա, անընդունելի է: «Դու ո՞վ ես, ի՞նչ Հայաստան, դու շատ-շատ Կիրովական ես»,- ասաց նա: