Եվրախորհրդարանում սկսել են մտածել ռոբոտների կարգավիճակի մասին

Եվրոպական խորհրդարանը մտադիր է քվեարկության դնել կանոնների ժողովածու, որոնցով մարդիկ պետք է շփվեն արհեստական ինտելեկտի ու ռոբոտների հետ։ Եվրախորհրդարանականները հստակ հասկացրել են, որ իրենց կարծիքով աշխարհը կանգնած է ռոբոտների արդյունաբերական նոր հեղափոխության շեմին, հայտնում է BBC–ն։

Եվրոպական օրենսդիրները կորոշեն, արդյոք արժե ապագա ռոբոտներին տրամադրել «էլեկտրոնային անձի» կարգավիճակ։

Եվրախորհրդարանին ներկայացված զեկույցից հետեւում է, որ ռոբոտներ մշակողները պետք է երաշխավորեն, որ դրանցից յուրաքանչյուրը կունենա սարք, որով անհրաժեշտության դեպքում հնարավոր կլինի անջատել դրա բոլոր գործառույթները։

Ռոբոտներ գործածողները պետք է ապահովագրված լինեն ֆիզիկական կամ հոգեբանական տրավմաներ ստանալու ռիսկից, ասվում է զեկույցում։

Զեկույցը կանխետեսում է, որ մի քանի տասնամյակից արհեստական ինտելեկտը իր հնարավորություններով կգերազանցի մարդկայինը։

Ու եթե դրան ժամանակին չնախապատրաստվենք, մեքենաների ինտելեկտուալ գերազանցությունը կարող է բարդացնել դրանց վերահսկողության խնդիրը։ Հնարավոր է հարցականի տակ հայտնվի նաեւ սեփական ճակատագրի տերը մնալու՝ մարդկանց կարողությունը։