Թուրքիայի քրդամետ ուժերը զանգվածային ընդվզման կոչ են արել

Թուրքիայի քրդամետ Ժողովրդադեմոկրատական կուսակցության խոսնակ Այհան Բիլգենը երկրի կառավարման խորհրդարանական համակարգից նախագահականին անցնելու իշխող կուսակցության առաջարկի դեմ զանգվածային ընդվզման կոչ է արել ժողովրդին, գրում է թուրքական diken.com.tr կայքը: 

Իրենց այս որոշումը Բիլգենը հիմնավորել է նրանով, որ կուսակցության երկու համանախագահներն ու 8 պատգամավոր դեռևս գտնվում են անազատության մեջ և զրկված են խորհրդարանական քննարկումներին ներկա գտնվելու ու քվեարկությանը մասնակցելու հնարավորությունից:

Հիշեցնենք, որ Թուրքիայի իշխող «Արդարություն և զարգացում» կուսակցությունը երկրի խորհրդարան է ներկայացրել սահմանադրական փոփոխությունների վերաբերյալ նախագիծը, որը ներառում է նաև կառավարման խորհրդարանական համակարգից նախագահականին անցում:

Նոյեմբերի 4-ին Դիարբեքիրում և Անկարայում ձերբակալվել է քրդամետ Ժողովրդադեմոկրատական կուսակցության 10-ից ավելի անդամ, այդ թվում` կուսակցության համանախագահներ Սելահաթթին Դեմիրթաշն ու Ֆիգեն Յուքսեքդաղը: