Թուրքիայում քրդամետ կուսակցությունը հայերի կորուստները փոխհատուցելու կոչ է արել

Թուրքիայում ընդդիմադիր քրդամետ Ժողովուրդների դեմոկրատական կուսակցության մի խումբ անդամներ, ձեռքներին «Առերեսվեք ցեղասպանությանը» գրությամբ պաստառներով և 1915 թվականին աքսորված ու սպանված հայ մտավորականների լուսանկարներով, Կ.Պոլսում մասնակցել են երթի:

Նրանք մոմ են վառել և մեխակներ դրել զոհերի հիշատակին: Երթի մասնակիցները մեխակներ են թողել նաև Հայոց ցեղապանության զոհ Գրիգոր Զոհրապի տան առջև:

Ի դեպ, երթի մասնակիցները տարել են նաեւ Հրանտ Դինքի, Մարիցա Քյուչուքի և Սևակ Բալքըչըի լուսանկարները` ընդգծելով, որ այդ մարդիկ էլ դեռեւս շարունակվող ցեղասպանության զոհերն են:

Կուսակցության Շիշլիի ղեկավարներից Մելիս Թանթանը երթի ընթացքում ելույթով է հանդես եկել:

Շեշտելով, որ Ցեղասպանությունն անհապաղ պետք է ճանաչվի, Թանթանն ասել է. «1915 թվականի հետ իրական առերեսման և խաղաղության համար պետք է անհապաղ ճանաչվի Ցեղասպանությունը: Հանցավորներին պետք է բացահայտել, փոխհատուցում տալ և հիմնել իրականության ու առերեսման հանձնաժողովներ: Հայերի հետ տնտեսական, քաղաքական և դիվանագիտական հարաբերություններ պետք է զարգացվեն: Անվերապահորեն պետք է բացվի Թուրքիայի կողմից փակված` Հայաստանի հետ սահմանը: Պետք է ջանքեր գործադրվեն ԼՂ հարցի լուծման ուղղությամբ և կամուրջներ հիմնվեն հայ ժողովրդի հետ բարեկամության համար: Ցեղասպանությունը ճանաչելն ու ներողություն խնդրելը ո’չ պետությանը, ո’չ էլ ժողովրդին չի նվաստացնի»: