Թուրք ոստիկանները լրագրողին վիրավորելու համար օգտագործել են «հայ բիճ» արտահայտությունը

Այսօր վաղ առավոտյան Թուրքիայում ձերբակալվել են թուրքական Diken հայտնի ընդդիմադիր կայքի լրագրող Թունջա Օղրեթենը, Yolculuk թերթի հոդվածների պատասխանատու Էրայ Սարգընը, Dihaber կայքի լրագրողներ Օմեր Չելիքը և Մեթին Յոքսուն, ինչպես նաև BirGün թերթի լրագրող Մահիր Քանաթը. տեղեկացնում է Ermenihaber-ը:

Ձերբակալություններն ուղեկցվել են լրագրողների նկատմամբ դաժան վերաբերմունքով, տների խուզարկությամբ ու հեռախոսների, համակարգիչների և նկարահանող սարքերի հիշողության քարտերի առգրավմամբ:

Հատկապես ուշագրավ է Օմեր Չելիքի ձերբակալությունը, որին ոստիկանները ծեծի են ենթարկել ու նրան վիրավորելու նպատակով ամենատարբեր հայհոյանքների հետ մեկտեղ օգտագործել «հայ բիճ» արտահայտությունը:

Ըստ հայկական «Ակօս» թերթի կայքի` ոստիկանները լուսադեմին ներխուժել են Չելիքի տուն, հատակին պառկեցրել լրագրողի մորն ու կնոջը, իսկ Չելիքին ծեծի ենթարկել: Ոստիկաններից մեկը, ցանկանալով Չելիքին վիրավորել, ասել է. «Դուք` բոլորդ, հայ բճեր եք»:  

Ստամբուլի իր տանը ձերբակալված Մահիր Քանաթի վերաբերյալ էլ տեղեկություն չի տրամադրվում, նույնիսկ 5 օրով արգելվել է նրա՝ փաստաբանի հետ տեսակցությունը:

«Ազատ» ռադիոյի եթերի պատասխանատու և ETHA լրատվական գործակալության տնօրեն Դերյա Օքաթանի նկատմամբ նույնպես ձերբակալության որոշում է կայացվել: