Թուրք լրագրողին դատել են երկրի նախագահին վիրավորելու համար

Թուրքիայի` կոմունիստական ուղղվածություն ունեցող Sol թերթի միջազգային նորությունների խմբագիր Ալի Օրնեկը 14 ամիս պայմանական ժամկետով դատապարտվել է երկրի նախագահին վիրավորելու համար, սակայն պայմանական ժամկետը կփոխարինվի իրականով, եթե մոտակա 5 տարիների ընթացքում նման բան կրկնվի. տեղեկացնում է Zaman-ը:

Օրնեկին դատել են Itusozluk կայքում Աբդուլլահ Գյուլի անվան համալսարանի կապակցությամբ արված մեկնաբանությունների համար: Նա գրել էր, որ Գյուլի հայրենի քաղաքում գտնվող համալսարանի շրջանավարտները կգնան գործող նախագահի հետքերով: «Այդ համալսարանում տիրում են անգործությունը, կոռուպցիան եւ քավոր-սանիկությունը»,- գրել էր Օրնեկը:

Դատարանում նա հայտարարել է, որ Թուրքիայի նախագահին չի վիրավորել, խոսել է նրա քաղաքական շրջապատի մասին: Օրնեկը պատրաստվում է բողոքարկել դատավճիռը: