Հայաստանը` վարկային տենդի մեջ. Նիկոլ Փաշինյան

Այսօր ԱԺ արտահերթ նիստում քննարկվում է երկու վարկային համաձայնագիր հաստատելու հարցը: Ելույթ ունեցավ ՀԱԿ խմբակցության պատգամավոր Նիկոլ Փաշինյանը: Նրա կարծիքով` Հայաստանն ընկել է վարկային տենդի մեջ, և իրավիճակը կարծես դուրս է գալիս վերահսկողությունից:

Ըստ Փաշինյանի` պետական պարտքի սպասարկման վրա բյուջեից 2016-ին ծախսվել է 62 տոկոսով ավելի, քան նախորդ տարին: Արդեն ընդունած բյուջեի նախագծով նախատեսվում է, որ պետական ծախսի սպասարկման վրա պետք է ծախսվի էլ ավելի մեծ գումար:

«Պետական պարտքի սպասարկմանը ավելի շատ փող ենք տալիս, քան կրթության և գիտության նախարարությանը և առողջապահության նախարարությանը: Պետական պարտքի սպասարկումը բյուջեում երրորդ տեղում է սոցիալական և պաշտպանական ծախսերից հետո»,- ասաց Նիկոլ Փաշինյանը:

Պատգամավորը մեջբերեց կառավարության փաստարկը, որ վարկ տալիս են այն պետությանը, որին վստահում են, և որը վարկունակ է: Այդ փաստարկը նա համեմատեց մի իրավիճակի հետ: Երեկ նրան մի գյուղացի է զանգել ու խնդրել օգնել բանկ դիմելու հարցում. գյուղացին չի կարողացել մարել 1000 դոլար պարտքը, և բանկը նրան նոր վարկ է տալիս, որ նախկինը մարի: «Հիմա ի՞նչ, ասենք, որ գյուղացին վարկունա՞կ է ու վստահելի՞»,- հարցրեց Փաշինյանը:

Ըստ նրա` վարկային մի համաձայնագիր կա, որը խիստ կասկածների տեղիք է տալիս: Ամենացցուն օրինակը միլիարդավոր գումարներ պարունակող «Հյուսիս-հարավ» վարկային ծրագիրն է, որի միջոցները թալանվել են, իսկ պատասխան տվողներ չկան: Պատգամավորի համոզմամբ` այս վարկերը վերցնում են բյուջեի անխուսափելի թերակատարումը ծածկելու համար: