Փոփոխություններ՝ կենսաթոշակի հետգանձման մեխանիզմում

Խորհրդարանն առաջին ընթերցմամբ` 80 կողմ, 1 դեմ և 18 ձեռնպահ ձայներով, ընդունեց «Պետական կենսաթոշակների մասին» ՀՀ օրենքում փոփոխություններ և լրացումներ կատարելու մասին» օրինագիծը:

Առաջարկվում է սահմանել, որ կենսաթոշակի` ավելի վճարված  գումարները կարող են հետ գանձվել կենսաթոշակ նշանակող ստորաբաժանման և կենսաթոշակառուի միջև փոխհամաձայնեցված մարման ժամանակացույցի հիման վրա:

Հետ կգանձվեն այն գումարները, որոնք սխալմամբ կենսաթոշակառուին են վճարվել սխալը հայտնաբերելու օրվան նախորդող 3 տարվա ընթացքում: Առաջարկվում է մինչև 2016 թվականի հունվարի 1-ը կենսաթոշակների` ավելի վճարված  գումարների մասով առաջացած պարտավորությունները զիջել բացառությամբ այն դեպքի, երբ կենսաթոշակի գումարը վճարվել է կենսաթոշակառուի մահվան ամսվան հաջորդող ամիսների համար կամ կենսաթոշակի գումարը վճարվել է ՀՀ քրեական օրենսգրքով նախատեսված արարքի հետևանքով:

Նախագծով առաջարկվում է կանոնակարգել նաև քրեակատարողական հիմնարկում գտնվող կալանավորված անձի կենսաթոշակի իրավունքի իրացման կարգը: