Կուտակային կենսաթոշակի մասին օրենքն ընդունվեց կանոնակարգի խախտումներով. հաջորդեց սկանդալ

Քիչ առաջ Ազգային ժողովում քվեակության դրվեց կուտակային կենսթոշակների մասին օրենքում փոփոխություն կատարելու մասին հարցը: Կողմ քվեարկեց 67 պատգամավոր: Դեմ և ձեռնպահ քվեարկողներ չկային:

«Որոշումն ընդունվել է»,- հայտարարեց ԱԺ նախագահ Գալուստ Սահակյանը:

Քվեարկությունից հետո ելույթ ունեցավ ՀՅԴ խմբակցության քարտուղար Աղվան Վարդանյանը: Նա նշեց, որ բացակայի փոխարեն քվեարկել են, պետք է սա արձանագրել և հետևություն անել: «Տղամարդկությունը էն չի, որ օրենքը խախտենք: Տղամարդկությունը էն է, որ ամեն մեկը իր գործն անի: Էս մեթոդներով շատ հեռու չենք գնալու»,- ասաց Աղվան Վարդանյանը: Նա կոչ արեց պատգամավորներին լինել օրենքի սահմաններում:

«Որը, ի դեպ, կատարում ենք»,- արձագանքեց Գալուստ Սահակյանը:

Այնուհետև ելույթ ունեցավ ՀՅԴ խմբակցության պատգամավոր Արծվիկ Մինասյանը: Նա նշեց, որ իրենց խմբակցությունը չմասնակցեց կուտակային օրենքի քվեարկությանը: Երկրորդ` ԱԺ դահլիճում միայն ՀՀԿ խմբակցության և անկախ պատգամավորների թիվը 64 է, և սա պետք է արձանագրել: Երրորդ` կենսաթոշակային օրենքը չի կարող այսօր ընդունվել, քանի որ դա կանոնակարգի խախտում է: Երբ Արծվիկ Մինասյանը փորձում էր թվարկել այսօրվա նիստի մյուս խախտումը, նրա խոսափողն անջատեցին:

Այնուհետև խոսեց ՀՀԿ խմբակցության պատգամավոր Սպարտակ Մելիքյանը: Նա ասաց, որ իրեն զրպարտում են, թե քվեարկում է ուրիշի տեղը: «Տղամարդկությունն ապացուցելու համար տեղեր կան: Ես ձեզ կապացուցեմ իմ տղամարդկությունը»,- ասաց Մելիքյանը:

ՀՀԿ խմբակցության ղեկավար Վահրամ Բաղդասարյանը նշեց, որ դահլիճում բռնել են շանտաժի ճանապարհը: Նա «դաշնակցական իր ընկերներին» առաջարկեց կատարել «հաշվետարի դեր» և հաշվել քվեարկությանը մասնակցած 67 պատգամավորին:

ՀԱԿ խմբակցության ղեկավար Լևոն Զուրաբյանը նշեց, որ քառյակը և անկախ պատգամավորները դեմ են այս օրենքին, բայց չեն քվեարկել, որ օրենքը չանցնի: Նա խնդրեց 20 րոպե ընդմիջում, որ խմբակցությունները քննարկեն կանոնակարգի «սիստեմատիկ խախտումները»:

«Ես կարծում եմ` արդեն քաղաքական դաշտից դուրս եք եկել, տեխնիկական դաշտ եք մտել»,- ասաց Գալուստ Սահակյանը` փաստացի մերժելով Զուրաբյանի պահանջը:

Այնուհետև Սահակյանն ուզում էր անցնել մյուս հարցերի քվեարկությունը: Սակայն ԲՀԿ խմբակցության պատգամավոր Վարդան Օսկանյանը սկսեց դժգոհել` ասելով, որ իրեն նվաստացած է զգում, և Գալուստ Սահակյանը իրավունք չունի մերժել 20 րոպե ընդմիջման պահանջը:

Գալուստ Սահակյանը դարձյալ մերժեց:

Անդրադառնալով «հաշվետարի» մասին դիտարկմանը` Աղվան Վարդանյանն ասաց, որ ընդամենը կոչ են արել պահպանել օրենքները: Վարդանյանի խոսքով` եթե այսօր ոմանք հնարավորություն ունեն այսպես առաջ գնալու, ապա 5-10 տարի հետո չեն կարողանալու, և օրենքն այսօր խախտողներն իրենք են խնդրելու, որ օրենքը պահպանվի:

Այնուհետև Գալուստ Սահակյանը մերժեց նաև ՕԵԿ խմբակցության ղեկավար Հեղինե Բիշարյանի խնդրանքը` կրքերը հանդարտեցնելու նպատակով հայտարարել 20 րոպե ընդմիջում:

Սահակյանը շարունակեց քվեարկության դնել օրակարգի մյուս հարցերը, որոնք ընդունվեցին: