Դեմիրթաշը բանտում վատացել է, իշխանությունները մերժել են նրան հիվանդանոց տեղափոխելու առաջարկը

Թուրքիայում քրդամետ Ժողովուրդների դեմոկրատական կուսակցության խոսնակ Այհան Բիլգենը հայտարարել է, որ բանտում վատացել է կուսակցության համանախագահ Սելահաթթին Դեմիրթաշի առողջական վիճակը: Նա սրտամկանի կծկում է ունեցել:

Հիշեցնենք, որ Դեմիրթաշը ձերբակալվել է նոյեմբերի 4-ին: Իշխանությունները նրան, համանախագահ Ֆիգեն Յուքսեքդաղին և կուսակցության ևս 8 պատգամավորների կալանավորել են՝ ահաբեկչության քարոզչություն իրականացնելու մեղադրանքով:

Ըստ Haber.Sol.-ի՝  Բիլգենը հայտնել է, որ իրենք խիստ մտահոգված են Դեմիրթաշի առողջական վիճակով: Ընդ որում` սա արդեն երկրորդ դեպքն է, որ Դեմիրթաշը սրտամկանի կծկումներ է ունենում բանտում, սակայն համապատասխան մարմինները մերժում են նրա փաստաբանների` Դեմիրթաշին հիվանդանոց տեղափոխելու պահանջը:

Բիլգենը հայտարարել է նաև, որ Դեմիրթաշի ներկայացուցիչները պատրաստվում են դիմել Թուրքիայի բժիշկների ասոցիացիա` անկողմնակալ բժիշկների կողմից համապատասխան հիվանդանոցում ստուգումներ անցկացնելու պահանջով: