Կարեն Կարապետյանի «երկարաշունչ» պատասխանը՝ Փաշինյանին

ԱԺ-ում կառավարության հետ հարցուպատասխանի ժամանակ ՀԱԿ խմբակցության պատգամավոր Նիկոլ Փաշինյանը հարց ուղղեց վարչապետ Կարեն Կարապետյանին: Նա նախ նշեց, որ նախահարց ունի` ինչո՞ւ Կարեն Կարապետյանը, Սահմանադրության 80 հոդվածի համաձայն, ներկա չէր նախորդ հարցուպատասխանին, գերադասել էր գնալ Մոսկվա: «Դա կարո՞ղ է նշանակել, որ երբ ընտրություն լինի ՀՀ-ի և ՌԴ-ի միջև, Դուք ընտրություն կկատարեք հօգուտ Մոսկվայի»,- հարցրեց Փաշինյանը:

Ապա շարադրեց հիմնական հարցը: Նա նշեց, որ ուրախալի իրադարձություն է տեղի ունեցել` գազի սակագինն է իջել, բայց առջևում երկու ընտրություն կա՝ խորհրդարանական ու քաղաքապետի, և Հայաստանը տխուր փորձ ունի, որ ընտրություններից հետո սակագները բարձրանում են: «Եթե Ձեր հարազատ կուսակցության համար ընտրություններն ընթանան ցանկալի սցենարով, կարո՞ղ եք երաշխավորել, որ ընտրություններից հետո էլեկտրաէներգիայի և գազի սակագինը չի բարձրանա, կամ` կարո՞ղ եք երաշխավորել, որ այդ էժանացման համար ՀՀ-ն չի վճարի որևէ ռազմավարական շահով, օբյեկտով, հեռանկարով»,- հարցրեց պատգամավորը:

Կարեն Կարապետյանը պատասխանեց, որ նախահարցը հարց չէր, ինքը կպատասխանի հիմնական հարցին և մեկ բառով պատասխանեց. «Այո»:

Փաշինյանը խնդրեց հստակեցնել` ինչ է նշանակում այդ «այո»-ն:

Կարեն Կարապետյանը պատասխանեց, որ դա նշանակում է, որ ընտրություններից հետո գազի գինը չի բարձրանա, և այդ էժանացման համար ՀՀ-ն չի վճարի որևէ ռազմավարական օբյեկտով: