«Խաղաղ աղետի» պատճառը

Դեկտեմբերի 3-ին ամբողջ աշխարհը նշում է Թունաքիմիկատների (պեստիցիդներ) դեմ պայքարի միջազգային օրը: Այս օրը պատահական չէ ընտրված՝ 1984 թվականի դեկտեմբերի 3-ին Հնդկաստանի Բհոպալ քաղաքի թունաքիմիկատների գործարանում բնապահպանական աղետ է տեղի ունեցել, ինչի հիշատակին էլ հիմնվել է այս օրը: Օրվա խորհուրդն է՝ հասարակության ուշադրությունը հրավիրել վտանգավոր քիմիկատների խնդրին:

Օրվա կարգախոսն է՝ «Թունաքիմիկատները քաղաքակրթության փակուղին են»:

Թունաքիմիկատները կամ պեստիցիդները սինթետիկ քիմիական նյութեր են, որոնք 20-րդ դարի երկրորդ կեսից աշխարհի շատ երկրներ օգտագործում էին գյուղատնտեսական մշակաբույսերի բերքատվությունը բարձրացնելու համար: Սակայն, ինչպես պարզվեց ավելի ուշ դրանց արտադրությունը մոլորակի բնակչությանն ավելի մեծ վնաս է հասցնում, քան օգուտ:

Դրանց օգտագործումը մարդկանց եւ կենդանիների մոտ հանգեցրել է մի շարք մուտացիաների եւ հիվանդությունների, ինչպես նաեւ կազմալուծման վերարտադրողական եւ հորմոնալ համակարգերի, իմունոլոգիական կարգավիճակի, քաղցկեղի եւ ծննդյան թերությունների:

 Ըստ Առողջապահության համաշխարհային կազմակերպության, ամեն տարի շուրջ 2 մլն թունավորման դեպք է գրանցվում, հիմնականում թունաքիմիկատների հետ աշխատելու պատճառով:

ՄԱԿ-ի փորձագետները կարծում են, որ հենց թունաքիմիկատներն են «խաղաղ աղետի» պատճառ դարձել. այդպես է կոչվում Եվրոպայում հողի այժմյան վիճակը: