Ափսոսում եմ, որ չկան պետական պատվերներ. նկարիչների միության նախագահ

Համաշխարհային հայկական կոնգրեսի, Ռուսաստանի հայերի միության, ՀՀ Սփյուռքի նախարարության և Հայաստանի նկարիչների միության հայտարարած` հայ կերպարվեստի լավագույն ստեղծագործությունների մրցույթը` նվիրված ՀՀ անկախության 25-ամյա հոբելյանին, կայացավ այս տարվա սեպտեմբերի 16-25-ը:

Քվեարկության արդյունքում «Գեղանկար» անվանակարգում մրցանակի են արժանացել`

 1. Ազիզյան Խաչատուր` «Դավթի մենամարտը Մելիքի դեմ», 2. Ղևոնդյան Ռուբեն` «Նուռ», 3. Վարդանյան Էդիկ` «Մգրեն» և «Անկախության առաջամարտիկ Մովսես Գորգիսյան»:

«Քանդակ» անվանակարգում`

1. Թումանյան Նունե` «Կաթիլ մը…», 2. Համբարձումյան Արման` «Ձախլիկ ռազմիկը» և «Տրոյայի հերոսները»:

«Գրաֆիկա» անվանակարգում`

 1.Փաշայան Կարապետ և Աբրահամյան Կարապետ` «Անկախության 25-ամյակի խորհրդանիշի էսքիզներ», 2 .Պարեմուզովա Մարգարիտա` «Վառված ծառերի հիշատակին»:

«Դեկորատիվ-կիրառական արվեստ» անվանակարգում`

 1. Ղևոնդյան Այծեմիկ` «Ուրարտական ծեսական զգեստ»:

Նկարիչների միության նախագահ Կարեն Աղամյանի խոսքով՝ մրցույթն անցկացվում է 2007թ.-ից` արդեն տասներորդ անգամ: Հանձնաժողովի որոշմամբ` ցուցահանդեսի մասնակից` ՀՆՄ անդամ ստեղծագործողներն են որոշել լավագույն ստեղծագործությունները՝ 4 անվանակարգերում: Մրցանակային ֆոնդի գումարով նկարիչների միությունը կհրատարակի նաև պատկերագիրք:

Աղամյանը շնորհակալություն հայտնեց Համաշխարհային հայկական կոնգրեսին, Ռուսաստանի հայերի միությանը և ՀՀ Սփյուռքի նախարարությանը մրցանակաբաշխությունը կազմակերպելու համար` նշելով, որ դա ոգևորում է նկարիչներին: Նաև ափսոսանք հայտնեց, որ չկան պետական պատվերներ, առանց որոնց հնարավոր չէ ստեղծել  թեմատիկ աշխատանքներ:

«Ընդհանուր մրցանակային ֆոնդը 42 մլն դրամ է, և այդ միջոցները տրամադրում է  Ռուսաստանի հայերի միության և Համաշխարհային հայկական կոնգրեսի նախագահ Արա Աբրահամյանը»,- լրագրողներին հայտնեց Համաշխարհային հայկական կոնգրեսի ներկայացուցիչը: