Նկարիչների միության հնարավորությունները թույլ են տալիս գոյատևել միայն մեր երկրի սահմաններում

Նկարիչների միության համար տարին բեղմնավոր էր. ընթացիկ տարում 50 ցուցահանդես է կազմակերպվել: Այս մասին լրագրողներին հայտնեց Նկարիչների միության նախագահ Կարեն Աղամյանը:

Ըստ նրա` միությունն այսօր մի շարք խնդիրներ ունի` իրենց դահիճների հնարավորությունները զիջում են նկարիչների պահանջներին: «Հայի մեջ ստեղծագործական ջիղը կա, և եթե մարդուն տալիս ես հնարավորություն, նա աշխատում է: Նկարիչների միության հնարավորությունները թույլ են տալիս գոյատևել միայն մեր երկրի սահմաններում, երկրից դուրս ցուցադրություն կազմակերպելու խնդիր ունենք»,- ասաց Աղամյանը:

Ըստ նրա` այսօր չկա արվեստանոցային այն ֆոնդը, որը կար ժամանակին, այսինքն` եթե նախկինում 1000-ից ավելի արվեստանոց կար, հիմա` հազիվ 100: «Ժամանակին նկարիչը վաճառում էր իր նկարները և ապրում, հիմա բարդացել է այդ գործընթացը: Մեր օրերում մեծահարուստները նախընտրում են գնել հայտնի անունների գործերը»,- հավելեց Աղամյանը: