Ընդդիմադիր Cumhuriyet-ը դարձյալ հայտնվել է թուրքական իշխանությունների թիրախում. ձերբակալվել են թերթի աշխատակիցներ

Թուրքական ոստիկանությունը ընդդիմադիր Cumhuriyet թերթի խմբագիրների և աշխատակիցների դեմ հերթական անգամ հատուկ գործողություններ է իրականացրել:

Ըստ Demokrathaber-ի` ոստիկանությունն առավոտյան ժամերին ներխուժել է թերթի խմբագիրներից Մուաթ Սաբունջուի, աշխատակիցներից` Աքըն Աթալայի և Գյուրայ Օզի բնակարանները: Գործողության շրջանակներում ձերբակալվել են Սաբունջուն, ինչպես նաև թղթակից Այդըն Էնգինը:

Թերթի թղթակիցներից Հիքմեթ Չեթինքայայի և նկարիչ Մուսա Քարթի տանը խուզարկություն է իրականացվում:

Ինչ վերաբերում է թերթի խմբագիրներից Գյուրայ Օզին, ով նաև թերթի հիմնադրամի անդամ է, նա ձերբակալվել է Անկարայում:

Ստամբուլի գլխավոր դատախազությունն այդ մասին հայտարարությամբ է հանդես եկել` նշելով, որ թերթի աշխատակիցները ձերբակալվել են «Գյուլենական շարժման, ինչպես նաև քուրդ և այլ զինյալ խմբավորումների անդամ դառնալու, այդ խմբավորումների անունից հանցագործություններ իրականացնելու» մեղադրանքով: