Հրապարակվել է թուրքական ընդդիմադիր «Zaman» թերթի աշխատակիցների դատավճիռը

Ստամբուլի   ծանր հանցանքների  13-րդ դատարանում հրապարակվել են Թուրքիայում փակված ընդդիմադիր«Zaman» թերթի 15 աշխատակիցների դատավճիռները։

Միջանկյալ նշենք, որ «Zaman» թերթը փակվել էր 2016 թվականին: Այն համարվում էր իսլամի հայտնի քարոզիչ ամերիկաբնակ թուրք միլիարդատեր Ֆեթուլլահ Գյուլենի հիմնած շարժման լրատվական օրգանը, որի մի շարք ներկայացուցիչներ կալանավորվել էին «ահաբեկչական կազմակերպությանն անդամակցելու» մեղադրանքի հիման վրա։

15 մեղադրյալներից 10-ը մեղադրվել են «ահաբեկչական կազմակերպությանն անդամակցության» և «Թուրքիայի խորհրդարանը  և կառավարությունը լուծարելու փորձի», ինչպես նաև «ահաբեկչական կազմակերպությանն աջակցելու» մեջ, իսկ  5-ը արդարացվել են։

10 մեղադրյալներից Հաքան Թաշդելենը, Ահմեթ Մեթին Սեքիզքարդեշը, Ֆարուք Աքքանը դատապարտվել են 9  տարվա ազատարկման։  Մեղադրյալներ Օսման Նուրի Արսլանը, Ահմեթ Իրեմը, Յուքսել Դուրգութը դատապարտվել են 7 տարվա ազատազրկման։ Մնացած անդամները դատապարտվել են մինչև 3 տարվա ազատազրկման։