Պատասխան եք տալու. թուրքական Cumhuriyet թերթը Դավութօղլուին դատի է տվել

Մահացած դատախազ Մեհմեդ Սելիմ Քիրազի հուղարկավորման արարողությանը մի շարք լրատվամիջոցների, այդ թվում` Cumhuriyet-ի մուտքն արգելած վարչապետ Ահմեդ Դավութօղլուն հայտնվել է վատ իրավիճակում:

Ըստ T24-ի` Cumhuriyet թերթը դատի է տվել Դավութօղլուին` նշելով, որ նա խոչընդոտում է ժողովրդի` տեղեկություն ստանալու իրավունքին:

Թերթի` Դավութօղլուին հղած բաց նամակում նշվում է, որ նա, խոչընդոտելով մամուլի ազատությանը, բացահայտ հանցանք է գործել:

«Ինչպես մենք` թերթերն ու լրագրողներս, մեր սխալի համար դատարանի առջև պատասխան ենք տալիս, այնպես էլ Դուք եք պատասխան տալու: Եթե սա ժողովրդավարական, օրենքի երկիր է, մենք պետք է դրա պատասխանը պահանջենք, և Դուք էլ պարտավոր եք պատասխան տալ»,- ասված է նամակում:

Նշվել է նաև, որ Դավութօղլուի այդ պահվածքը դեմ է Սահմանադրությանը:

Հիշեցնենք, որ Կ.Պոլսի գլխավոր դատախազությունը հայտնի Hürriyet, Cumhuriyet, Posta և Bugün թերթերի նկատմամբ հետաքննութուն էր սկսել՝ «ահաբեկչական գործողություններ քարոզելու» մեղադրանքով: