Ծառուկյանի լուսանկարը` ԲՀԿ-ում, ինչպես Լենինինը՝ Կոմկուսում

Այսօր խորհրդարանական ճեպազրույցներում ԲՀԿ խմբակցության պատգամավոր Լյովա Խաչատրյանը, պատասխանելով հարցին, թե հավատո՞ւմ են կառավարության իրականացրած փոփոխություններին, ասաց. «Երկու հազար տարի, առանց տեսնելու, հավատացել ենք, հիմա պիտի տեսնենք, նոր հավատանք: Արդեն քսան օր է, կառավարություն է ձևավորվել, դեռ արդունքներ չկան, իսկ խնդիրները շատ են»:

Լրագրողները հարցրեցին, թե ինչո՞ւ Լյովա Խաչատրյանը կողմ քվեարկեց ԿԸՀ նախագահի թեկնածությանը, տեսե՞լ էր նրա գործի արդյունքները, պատգամավորը պատասխանեց, որ նրա աշխատանքի արդյունքները տեսել է խորհրդարանական ընտրությունների ժամանակ և կողմ է քվեարկել, իսկ ԿԸՀ մնացած անդամների աշխատանքը չի տեսել, դրա համար էլ ձեռնպահ է քվեարկել:

Հարցին, թե վերջերս հանդիպե՞լ են Գագիկ Ծառուկյանի հետ և ի՞նչ են քննարկել, ԲՀԿ-ական պատգամավորը պատասխանեց, որ շատերը Գագիկ Ծառուկյանի հետ ընկերական հարաբերությունների մեջ են, նա կուսակցության հիմնադիրն է, և նրա հետ հանդիպումները պետք չէ դարձնել քննարկման առարկա:

Հարցին, թե արդյո՞ք այդ հանդիպումների ընթացքում Գագիկ Ծառուկյանը խոսում է քաղաքականությունից, և արդյո՞ք ստորագրություններ են հավաքվում` նրա վերադարձի խնդրանքով, Լյովա Խաչատրյանը պատասխանեց, որ ստորագրություններ չեն հավաքվում, և որ Ծառուկյանը միշտ էլ խոսում է քաղաքականությունից` որպես երկրի ճակատագրով մտահոգ ՀՀ քաղաքացի:

Իսկ թե ինչո՞ւ են ԲՀԿ տարածքային կառույցները մինչև օրս իրենց պատերին կախում Ծառուկյանի լուսանկարը: Լյովա Խաչատրյանը նշեց, որ շատ տրամաբանական է, որ կուսակցության հիմնադրի նկարը մինչ այժմ կա ԲՀԿ գրասենյակներում: «Կարծեմ` երջանկահիշատակ Անդրանիկ Մարգարյանի նկարն էլ մինչ օրս կա ՀՀԿ գրասենյակներում: Լենինի նկարն էլ միշտ ներկայացնում էին կոմունիստների գրասենյակներում»,- ասաց նա: