Թուրքիայում մեկնարկել են «1915» անունը կրող կամրջի նախագծային աշխատանքները

Այս տարի Չանաքքալեի ճակատամարտի 101-ամյակի կապակցությամբ ելույթում Թուրքիայի նախագահ Ռեջեփ Թայիփ Էրդողանը հայտարարել էր «1915» անունը կրող կամրջի կառուցման ծրագրերի մասին:

AA-ն տեղեկացնում է, որ կամրջի շինարարության տեղանքն ուսումնասիրելու համար Ճապոնիայից մասնագետներ են ժամանել Թուրքիա:

Ըստ կայքի՝ «Չանաքքալե 1915»-ը  կլինի աշխարհի ամենաերկար կամուրջը: Շինարարությունը նախատեսվում է սկսել հաջորդ տարվա մարտի 18-ին՝ Չանաքքալեի պատերազմի 102-ամյակին:

Նշենք, որ նախորդ տարի Թուրքիայի նախագահը հայտնել էր, որ «1915-ի կամուրջ» անունով կառույցի շինարարությունը կավարտվի 2023 թվականին՝ ի հիշատակ «թշնամու դեմ կանգնած» Չանաքքալեի:

Հիշեցնենք նաև, որ Թուրքիայի իշխանությունները Հայոց ցեղասպանության 100-րդ տարելիցի միջոցառումների վրա ստվեր գցելու նպատակով Չանաքքալեի միջոցառումները տեղափոխել էին ապրիլի 24-ին, սակայն, ի տարբերություն նախորդ տարվա, այս տարի նույն միջոցառումները տեղի են ունեցել ավանդաբար նշվող օրը` մարտի 18-ին: