Հարկային նոր օրենսգրքում բարելավում է նախատեսված` եկամտային հարկի մասով

ԱԺ արտահերթ նիստում քննարկվում է կառավարության ներկայացրած Հարկային նոր օրենսգրքի նախագիծը երկրորդ ընթերցմամբ ընդունելու հարցը:

Հիմնական զեկուցող` ՊԵԿ փոխնախագահ Վախթանգ Միրումյանը նշեց, որ առաջինից երկրորդ ընթերցմանը բերելու ընթացքում պատգամավորների, գործարարների կողմից ներկայացվել են բազմաթիվ առաջարկություններ, նախագիծն էապես լրամշակվել է: Նա շեշտեց, որ պատգամավորների առաջարկների մեծ մասը կա\'մ ընդունվել են, կա\'մ ընդունվել են մասամբ: Առաջարկվում է կիրառել 23 տոկոս դրույքաչափ` մինչև 150 հազար դրամ աշխատավարձների պարագայում, նախկին 120 հազար դրամի փոխարեն: Մյուս դրույքաչափը 28 տոկոս է, որն առաջարկվում է կիրառել 150 հազար դրամից մինչև 2 միլիոն դրամի պարագայում, իսկ 2 միլիոն դրամից բարձրի պարագայում պահպանվում է գործող՝ 36 տոկոս դրույքաչափը:

Վախթանգ Միրումյանը վերանայված սանդղակը գնահատեց որպես արդյունավետ: Մինչև 280 հազար դրամ աշխատավարձ ստացողները, որոնք կազմում են Հայաստանի բոլոր վարձու աշխատողների 89,9 տոկոսը կամ 550 հազար քաղաքացի, ունենալու ենք եկամտային հարկի գծով տնտեսումներ, այսինքն` հարաբերականորեն ավելի ցածր եկամուտներ ունեցողների դեպքում բեռը նվազում է: