Ճանապարհի կեսից ավելին անցել ենք. Պարգև սրբազան

Մենք բոլորս էլ աղոթում ենք, որ մի օր շուտ հանդարտ կերպով այս ամենն ավարտվի: Այս մասին Yerkir.am-ի հետ զրույցում ասաց Արցախի հոգևոր թեմի առաջնորդ Պարգև սրբազանը՝ խոսելով հուլիսի 17-ից ՊՊԾ գունդը գրաված զինված խմբի հետագա գործողությունների մասին:

«Կարծում եմ՝ ճանապարհի կեսից ավելին անցել ենք, Փառք Աստծո, որ պատանդները դուրս եկան, հուսանք, որ  երկու-երեք օրվա ընթացքում այս ամենը կավարտվի և բարի, խաղաղ ձևով կգտնվի նորմալ հանգրվանը: Սա է մեր բոլորիս մտահոգությունը և ցանկությունը»,- ասաց նա: Սրբազանի խոսքով՝ խաղաղ հանգուցալուծումը կլինի այն, որ զինյալները հանձնվեն. «Զենքերը պետք է վայր դնեն ու դուրս գան… մեզ  ո ՛չ զոհ է պետք,  ո ՛չ էլ վիրավոր, ո ՛չ էլ զենքով էդ հարցը կլուծեն: Ամենալավն ու ճիշտը,  մարդկայինն ու խոհեմն այն է, որ նրանք վայր դնեն զենքերն ու դուրս գան»:

Պարգև սրբազանը նաև նշեց, որ  երկրի իշանությունը և ուժային կառույցները  բանակցություններ  են վարում, որպեսզի շատ հանգիստ և հանդարտ կերպով այս հարցը լուծվի. «Զսպվածություն են դրսևորում, խոհեմություն…  դա շատ ճիշտ է: Մեզ բիրտ ուժ պետք չէ՝ ոչ մի  դեպքում, մենք հայ ենք, մեզ հարիր չէ»: