Նախնական տվյալներով`Արմավիրի մարզում վնասի չափը հասնում է 80-100 տոկոսի

Արդեն հայտնել ենք, որ հուլիսի 10-ին տեղացած հորդառատ անձրևի և կարկուտի հետևանքով տուժել են Արմավիրի շուրջ 15 համայնքներ:

Yerkir.am-ին Արմավիրի մարզպետարանից տեղեկացրեցին, որ Արմավիրի մարզի մի շարք համայնքներում, նախնական տվյալների համաձայն, վնասի չափը հասնում է 80-100 տոկոսի: Համայնքային հանձնաժողովները այսօրվանից կսկսեն աշխատանքները` վնասի իրական չափերը ճշտելու, մարզային հանձնաժողովին ներկայացնելու նպատակով:

«Մարզի երեք տարածաշրջանի  41 համայնք այս պահի դրությամբ լուրջ վնասներ է կրել, լուրջ վնասներ ունենք և\' Վաղարշապատի տարածաշրջանում, և\' Արմավիրի, և\' Բաղրամյանի: Պտուղ-բանջարեղենն է վնասվել, ցանքատարածությունները, վնասվել են նաև տներ, տանիքներ, ջերմոցային տնտեսություններ, ապակիներ են կոտրվել»,- հայտնեցին մարզպետարանից` հավելելով, որ վնասվել է նաև ջերմոցային տնտեսությունների ներսում գտնվող բերքը: